47వ అమెరికా అధ్యక్షుడిగా డొనాల్డ్ ట్రంప్ బాధ్యతలు చేపట్టిన తొలిరోజే గల్ఫ్ ఆఫ్ మెక్సికో పేరును గల్ఫ్ ఆఫ్ అమెరికాగా మారుస్తూ ఎగ్జిక్యూటివ్ ఆర్డర్ను జారీ చేశాడు. అమెరికా ఆర్థిక వ్యవస్థకు గల్ఫ్ ఆఫ్ మెక్సికో కీలకం. ఇది ప్రపంచంలోనే అతిపెద్ద గల్ఫ్. 9వ అతిపెద్ద జల వనరు. సముద్రంలో చమురు ఉత్పత్తి చేసే క్షేత్రాల్లో ప్రపంచంలోనే అతి పెద్దది గల్ఫ్ ఆఫ్ మెక్సికో. అమెరికా ముడి చమురు ఉత్పత్తిలో 14 శాతం, 5 శాతం సహజవాయువు ఉత్పత్తి ఇక్కడ నుంచే జరుగుతున్నది. అమెరికాలో వినియోగించే 40 శాతం మత్స్య సంపద ఇక్కడే లభిస్తున్నది.
గల్ఫ్ ఆఫ్ మెక్సికో 16 లక్షల చదరపు కిలోమీటర్ల మేరకు విస్తరించి ఉన్నది. ఇది అట్లాంటిక్ మహాసముద్రం, కరేబియన్ సముద్రం, తూర్పు మెక్సికో, ఆగ్నేయ అమెరికా, పశ్చిమ క్యూబా మధ్య ఉన్న ఒక సముద్ర ప్రాంతం. ఈ గల్ఫ్ చుట్టూ మెక్సికోకు చెందిన టమౌలిపస్, వెరక్రుజ్, టబస్కో, కాంపెచే, యుక్తాన్ రాష్ట్రాలు ఉన్నాయి.
గల్ఫ్ ఆఫ్ మెక్సికోకు సంబంధించి అమెరికా– మెక్సికో, అమెరికా–క్యూబా, మెక్సికో–క్యూబాల మధ్య సముద్ర సరిహద్దులకు సంబంధించి ఐక్యరాజ్యసమితి తదితర అంతర్జాతీయ సంస్థల సమక్షంలో కొన్ని ఒప్పందాలు జరిగాయి.
గల్ఫ్ ఆఫ్ మెక్సికోలోకి మిస్సిస్సిప్పీ, రియో గ్రాండే నదులు ప్రవహిస్తున్నాయి.
గల్ఫ్ ఆఫ్ మెక్సికో
ఈ పేరును 16వ శతాబ్దంలో స్పెయిన్కు చెందిన అన్వేషకులు తొలిసారి యూరోపియన్ మ్యాపుల్లో పేర్కొన్నారు. 1560 బ్రిటీష్ అన్వేషకుడు ఫ్రాన్సిస్ డ్రేక్, మ్యాపుల చిత్రాకారుడు బాప్టిస్ట్ బొయోజియో తన మ్యాపుల్లో గల్ఫ్ ఆఫ్ మెక్సికోగా గుర్తించారు. 1591లో డిబ్రై రూపొందించిన మ్యాపులో కూడా గల్ఫ్ ఆఫ్ మెక్సికో అనే పేరు ఉపయోగించారు. 1630లో రూపొందించిన మరో మ్యాపులో ఈ ప్రాంతాన్ని గల్ఫ్ ఆఫ్ న్యూ స్పెయిన్గా పేర్కొన్నారు. అమెరికాలో ప్రస్తుతం ఫ్లోరిడా రాష్ట్రాన్ని అప్పట్లో న్యూ స్పెయిన్గా పిలిచేవారు. అంతకుముందు ఎవరు ఎలా పిలిచినా 400 ఏండ్లుగా గల్ఫ్ ఆఫ్ మెక్సికో అనే పేరు వాడుకలో ఉన్నది.
ఎగ్జిక్యూటివ్ ఆర్డర్
అమెరికా చట్టసభ ఆమోదం లేకుండా కేంద్ర ప్రభుత్వానికి అధ్యక్షుడు జారీ చేసే లిఖిత పూర్వక ఆదేశాలనే ఎగ్జిక్యూటివ్ ఆర్డర్గా పేర్కొంటారు. ప్రభుత్వ విధానాలకు సంబంధించి అధ్యక్షుడు తీసుకునే కీలక నిర్ణయాలు ఇందులో ఉంటాయి. కేంద్ర సంస్థలకు ఆదేశాలు ఇవ్వడం లేదా నివేదికలను కోరడం వంటివి ఉండవచ్చు. అమెరికా రాజ్యాంగంలోని ఆర్టికల్ 2 ప్రకారం ఈ ఆదేశాలు జారీచేసే అధికారం అధ్యక్షుడికి ఉంటుంది. ఈ ఆదేశాలకు చట్టబద్ధత ఉంటుంది.
సాధారణంగా జారీచేసే ఆధికారిక ప్రకటన వంటి వాటికి మాత్రం చట్టబద్ధత ఉండదు. ఎగ్జిక్యూటివ్ ఆదేశాలను తిరస్కరించేందుకు చట్టాన్ని తీసుకొచ్చే అవకాశం కాంగ్రెస్ కు ఉన్నప్పటికీ దానిపై వీటో అధికారం మాత్రం అధ్యక్షుడిదే. అందుకే కాంగ్రెస్ ఆమోదించలేని అంశాలను తమ ఎజెండాలో అధ్యక్షుడు పెట్టుకుంటారు. చట్టసభ ఆమోదం లేకుండా జారీచేసే అధికారం అధ్యక్షుడికి ఉన్నా వీటికి కొన్ని పరిమితులు ఉన్నాయి. ఆదేశాలను వ్యతిరేకించలేనప్పటికీ ఆ నిర్ణయాలకు అవసరమైన నిధులు ఇవ్వకుండా అడ్డుకోవడం లేదా ఇతర అడ్డంకులు సృష్టించడం ద్వారా వీటి అమలుకు కాంగ్రెస్ ఆటంకం కలిగించే వీలు ఉన్నది.
