డిగ్రీ మరో విడత కౌన్సెలింగ్
పరీక్షలు రాయని వారినీ ఇంటర్ బోర్డు పాస్ చేయడంతో నిర్ణయం
దోస్త్ చివరి దశ కౌన్సెలింగ్కు ఏర్పాట్లు చేస్తున్న అధికారులు
ఇప్పటికే పూర్తయిన సెకండ్ఫేజ్, స్పెషల్ ఫేజ్ కౌన్సెలింగ్
హైదరాబాద్, వెలుగు: డిగ్రీ అడ్మిషన్ల కోసం మరో విడత కౌన్సెలింగ్ నిర్వహించాలని ఉన్నత విద్యామండలి నిర్ణయించింది. ఈ నెల మూడో వారంలో దోస్త్ ఫైనల్ ఫేజ్ కౌన్సెలింగ్ నిర్వహించేందుకు అధికారులు ఏర్పాట్లు చేస్తున్నారు. ఇంటర్ పరీక్షలు రాయని వారినీ బోర్డు పాస్ చేయడం, ఎంసెట్ కౌన్సెలింగ్ ఇంకా కొనసాగుతుండడంతో ఈ నిర్ణయం తీసుకున్నారు. రాష్ర్టంలోని ప్రభుత్వ, ప్రైవేటు డిగ్రీ కాలేజీల్లో ప్రవేశాల కోసం ఇప్పటికే రెండు విడతల్లో దోస్త్ కౌన్సెలింగ్తో పాటు స్పెషల్ ఫేజ్ కౌన్సెలింగ్ను నిర్వహించారు. అయితే, చాలామంది స్టూడెంట్లకు సీట్లు రాలేదు. సీట్లు దక్కించుకున్న వాళ్లంతా ఈ నెల 5 వరకు ఆన్లైన్లో రిపోర్ట్ చేయాల్సి ఉంది. సీట్లు రాని వాళ్లు రోజూ ఉన్నత విద్యామండలి, దోస్త్ ఆఫీసుల చుట్టూ తిరుగుతున్నారు. ఫీజు కట్టి పరీక్ష రాయని 27,589 మంది ఇంటర్ స్టూడెంట్లు, మాల్ ప్రాక్టీస్ కేసుల్లో బుక్కయిన వారిని గ్రేస్ మార్కులతో పాస్ చేస్తున్నట్లు బోర్డు రెండు రోజుల క్రితం వెల్లడించింది. మరోవైపు ఎంసెట్ స్పెషల్ ఫేజ్ కౌన్సెలింగ్ ఇంకా కొనసాగుతోంది. ఈ నెల12న సీట్ల కేటాయింపు ఉండగా, 17 వరకు సంబంధిత కాలేజీల్లో రిపోర్ట్ చేసేందుకు చాన్స్ ఇచ్చారు. దీంతో ఎంసెట్లో సీట్లు రాని స్టూడెంట్లు డిగ్రీ వైపు వచ్చే అవకాశం ఉంది. వీటన్నింటినీ లెక్కలోకి తీసుకున్న ఉన్నత విద్యా మండలి.. అలాంటి వాళ్ల కోసం మరో ఫేజ్ కౌన్సెలింగ్ నిర్వహించాలని నిర్ణయించింది. చివరి దశగా నిర్వహించే ఈ కౌన్సెలింగ్లో 20 వేలకు పైగా సీట్లు భర్తీ అయ్యే చాన్స్ ఉందని అధికారులు భావిస్తున్నారు. “మరో విడత దోస్త్ కౌన్సెలింగ్ నిర్వహించాలనుకుంటున్నాం. కౌన్సెలింగ్ ఎప్పుడు పెట్టాలన్న దానిపై రెండు మూడు రోజుల్లో నిర్ణయిస్తాం. తర్వాత షెడ్యూల్ రిలీజ్ చేస్తాం’’ అని దోస్త్ కన్వీనర్ ప్రొఫెసర్ లింబాద్రి చెప్పారు.
For More News..
