హైదరాబాద్ : నాంపల్లిలోని సాంకేతిక విద్య డైరెక్టర్ కార్యాలయం ముందు పాలిటెక్నిక్ విద్యార్థులు ఆందోళన చేపట్టారు. అధికారుల తప్పిదం కారణంగా తాము పరీక్షలు రాయలేకపోతున్నామని తద్వారా ఏడాది పాటు విద్యాసంవత్సరం నష్టపోయే అవకాశం ఉందని ఆవేదన వ్యక్తం చేశారు. హాజరు శాతం తక్కువగా ఉందని కండోనేషన్ ఫీ పేరుతో తమ నుంచి ఫీజులు వసూలు చేసి ఇప్పడు పరీక్షలకు అనుమతించకపోవడంపై నిరసన తెలిపారు. ఇప్పటికే మూడు పరీక్షలు అయిపోయాయని తమ కంటే తక్కువ హాజరు శాతం ఉన్న విద్యార్థులను పరీక్షలకు అనుమతించారని తెలిపారు. ఇప్పటికైనా అధికారులు స్పందించి తమను ప్రమోట్ చేయాలని డిమాండ్ చేశారు. ప్రస్తుతం జరుగుతున్న పరీక్షలను బ్యాక్లాగ్లో పూర్తి చేసుకుంటామని విఙప్తి చేశారు. కాగా ఈ విషయంపై అధికారులతో మాట్లాడి నిర్ణయం తీసుకుంటామని అసిస్టెంట్ డైరెక్టర్హామీ ఇచ్చారు.
ప్రమోట్ చేయండి..
"జీవితంలో ఎన్నో లక్ష్యాలు పెట్టుకున్న మా ఆశలపై అధికారులు నీళ్లు జల్లారు. పరీక్షలకు అనుమతించకపోవడంతో విద్యాసంవత్సరం నష్టపోతాం. దయచేసి మమ్మల్ని ప్రమోట్ చేయండి." అని ఓ విద్యార్థి ఆవేదన వ్యక్తం చేసింది.
అధికారుల దురుసు ప్రవర్తన...
మా కుమార్తె అనారోగ్యం కారణంగా 20 రోజులు కాలేజీకి వెళ్లలేదు. దీంతో అటెండెన్స్ తక్కువైందనే కారణంతో హాల్ టికెట్ కూడా ఇవ్వలేదు. అప్పటినుంచి మాసబ్ట్యాంక్కార్యాలయానికి నిత్యం తిరుగుతున్నా పట్టించుకునే వారే లేరు. అధికారులను అడిగితే దురుసుగా ప్రవర్తిస్తున్నారు. తల్లిదండ్రులను బయటికి వెళ్లగొడుతున్నారు.
