వాసాలమర్రిలో ఇండ్ల కూల్చివేతకు ఒకే

• అంగీకారం తెలిపిన 198 కుటుంబాలు
• 47 కుటుంబాలు ఒప్పుకోలే.. 19 ఫ్యామిలీస్ తటస్థం 

యాదాద్రి, వెలుగు : సీఎం కేసీఆర్​ దత్తత గ్రామమైన వాసాలమర్రిలో ఇండ్ల కూల్చివేతకు మెజార్టీ కుటుంబాలు ఓకే చెప్పాయి. కొన్ని కుటుంబాలు మాత్రం వ్యతిరేకించగా మరికొన్ని కటుంబాలు ఎటూ తేల్చుకోలేదు. అయితే కలెక్టర్‌‌‌‌ ఆదేశాల మేరకు ఆ కుటుంబాలను కూడా ఒప్పించేందుకు ఆఫీసర్లు ప్రయత్నాలు ప్రారంభించారు. దీంతో సీఎం కేసీఆర్​ ప్రకటించిన బంగారు వాసాలమర్రికి కొంతమేర లైన్​ క్లియర్​అయ్యింది.  

మూడేండ్ల తర్వాత..

మూడేండ్ల తర్వాత పట్టాలెక్కిన వాసాలమర్రి పునర్నిర్మాణం వేగంగా ముందుకు కదులుతోంది. ఇటీవలే యాదాద్రి కలెక్టర్​గా బాధ్యతలు చేపట్టిన వినయ్​ కృష్ణారెడ్డి ప్రత్యేక దృష్టిసారించారు. 481 ఇండ్ల నిర్మాణం కోసం రూపొందించిన లే అవుట్​ ప్రకారం చర్యలు చేపట్టారు. రెండు రోజులుగా జరుగుతున్న అభిప్రాయ సేకరణ బుధవారం ముగిసింది.  వీటిలో 103 పక్కా ఇండ్లు పోగా మిగిలిన 327 పెంకుటిండ్లను కూల్చి   కొత్తవి నిర్మించేందుకు అభిప్రాయాలు అడగగా..

198 కుటుంబాలు ఒప్పుకున్నాయి. దీంతో పాటు డబుల్​ బెడ్​రూమ్‌‌ ఇండ్ల నిర్మాణం జరిగే వరకూ పునరావాసంలో భాగంగా ప్రభుత్వం నిర్మించే తాత్కాలిక నివాసాల్లో ఉండేందుకు అంగీకరించాయి. 52 కుటుంబాలు తాము వేరే చోట నివాసముంటామని తెలిపాయి. 19 కుటుంబాలు ఏ నిర్ణయం తీసుకోలేదు. మరో 11 మంది అందుబాటులో లేరు. అయితే 47 కుటుంబాల యజమానులు మాత్రం తాము ఇక్కడే ఉంటామని, కొత్తగా నిర్మించే ఇండ్లు అవసరం లేదని తిరస్కరించాయి. 

వారిని ఒప్పించండి : కలెక్టర్​ 

తిరస్కరించిన కుటుంబాలను సాధ్యమైనంత త్వరగా ఒప్పించాలని కలెక్టర్​ వినయ్​ కృష్ణారెడ్డి అధికారులను ఆదేశించారు. వాసాలమర్రిలో బుధవారం ఆయన రివ్యూ నిర్వహించి లేఅవుట్​ను పరిశీలించారు. కుటుంబాలను ఒప్పించిన వెంటనే ఇప్పటికే గుర్తించిన 11 ఎకరాల్లో తాత్కాలిక నివాసాల ఏర్పాటుకు చర్యలు తీసుకోవాలని ఆదేశించారు. అనంతరం ఇండ్ల కూల్చివేతతో పాటు లేఅవుట్​ అభివృద్ధి, డబుల్​ బెడ్​రూమ్‌‌ ఇండ్ల నిర్మాణం కోసం వేర్వేరుగా టెండర్లు పిలవాలని సూచించారు.

వచ్చే నెలలో పనులు ప్రారంభించాలని ఆదేశించారు. ఎస్సీ కార్పొరేషన్​ఈడీ జినుకల శ్యాంసుందర్​, సర్పంచ్ పోగుల ఆంజనేయులు, ఎంపీటీసీ పలుగుల నవీన్ కుమార్, ఆఫీసర్లు శంకరయ్య, కరుణాకరన్, మల్లికార్జున్, యాదగిరి, దేశా నాయక్, ఉమాదేవి, వెంకటేశ్వర్లు ఉన్నారు.