సిటీ ప్రజల్లో డెంగ్యూ గుబులు రేపుతోంది. ఈ జ్వరాలే చికున్గున్యాకు దారి తీస్తున్నాయని వైద్యులు చెబుతున్నారు. ట్రాపికల్ ఫీవర్ ప్యానెల్ పరీక్షల్లో ఇది నిర్ధారణ అయ్యిందని అంటున్నారు. ఇటీవల అధికంగా జ్వరం, కీళ్లనొప్పులు ఉన్న రోగులకు వైద్య పరీక్షలు నిర్వహించగా, వారిలో పలువురికి చికున్గున్యా ఉన్నట్లు తేలింది.
సికింద్రాబాద్, వెలుగు : ఏడిస్ ఈజిప్టి దోమ రెండు రకాల వ్యాధులకు కారణమమవుతోంది. ఈ దోమ కాటుతో డెంగ్యూ జ్వరం వస్తుందని అందరికీ తెలిసిందే. అయితే, ఈ వ్యాధి లక్షణాలు ముదిరి చికున్గున్యాగా మారుతోంది. అకస్మాత్తుగా జ్వరం రావడం, తలనొప్పి, కళ్ల కింద వాపు, చర్మంపై రాషెస్ ఏర్పడటం డెంగ్యూ ఫివర్ లక్షణాలు. విపరీతమైన జ్వరం, కడుపునొప్పి, తరచూ వాంతులు రావడం, ముక్కు నుంచి రక్తం కారడం, తీవ్రమైన అలసట,ప్లేట్లెట్స్ కౌంట్ తగ్గడం వంటివి చికున్గున్యా లక్షణాలు.
డెంగ్యూ నెగెటివ్గా వస్తున్నప్పటికీ..
అయితే, డెంగ్యూ సోకిన చాలా మందిలో ఆ వ్యాధిని ఎదుర్కొనేందుకు అవసరమైన రోగనిరోధక శక్తిని పెంపొందించే యాంటీబాడీలు ఉంటాయని నల్లకుంటలోని ఫీవర్ఆస్పత్రి వైద్యులు తెలిపారు. కానీ, చికున్గున్యా వైరస్ను ఎదుర్కొనేంతగా శరీరంలో యాంటీబాడీలు ఉండవని అంటున్నారు. అటువంటి వారు ఏడిస్ ఈజిప్టి దోమ కాటుతో చికున్గున్యాకు గురయ్యే అవకాశం ఉందని వైద్యులు చెబుతున్నారు. జ్వరంతో పలువురికి డెంగ్యూ పరీక్షలో నెగెటివ్గా వస్తున్నప్పటికీ.. ఇతర లక్షణాలు ఉన్నట్లైతే చికున్గున్యాగా నిర్ధారించి చికిత్సలు అందిస్తున్నట్లు వివరించారు. నగరంలో 10 రోజులుగా ప్రతిరోజూ 3 నుంచి -4 చికున్ గున్యా కేసులు నమోదవుతున్నాయని పేర్కొన్నారు. చికున్గున్యా సోకిన వారికి భవిష్యత్తులో దీర్ఘకాలిక ఆర్థ రైటిస్ వచ్చే ప్రమాదం ఉందని అభిప్రాయపడుతున్నారు. వర్షాకాలం ప్రారంభం కావడంతో కాలనీలు, బస్తీల్లో దోమలు వృద్ధి చెందకుండా ఫాగింగ్చర్యలను జీహెచ్ఎంసీ ముమ్మురం చేయాలని, ప్రజలు సైతం పరిసరాల్లో నీరు నిల్వకుండా పరిశుభ్రంగా ఉంచుకోవాలని సూచిస్తున్నారు. వ్యాధి లక్షణాలు కనిపిస్తే వెంటనే వైద్యులను సంప్రదించాలని చెబుతున్నారు.
