- హైదరాబాద్కు రాక.. ఘన స్వాగతం పలికిన పార్టీ శ్రేణులు
హైదరాబాద్, వెలుగు: డిప్యూటీ సీఎం భట్టి విక్రమార్క విదేశీ పర్యటన విజయవంతంగా ముగిసింది. శుక్రవారం ఆయన హైదరాబాద్ కు చేరుకోగా.. శంషాబాద్ ఎయిర్ పోర్ట్లో పార్టీ శ్రేణులు, అధికారులు ఘన స్వాగతం పలికారు. గత నెల 24న ఆయన విదేశీ పర్యటన ప్రారంభమైంది. 11 రోజులపాటు అమెరికా, జపాన్ దేశాల్లో భట్టి అధికారికంగా పర్యటించారు. అమెరికా పర్యటనలో భాగంగా అంతర్జాతీయ మైనింగ్ ఎగ్జిబిషన్ ‘మైనెక్స్-–2024’లో కోమత్సు , హిటాచి, క్యాటర్ పిల్లర్ వంటి ప్రముఖ కంపెనీలు ఉత్పత్తి చేసిన అత్యాధునిక షావెల్స్, డంపర్లు, కంటిన్యూయస్ మైనర్ యంత్రాలు, గనిలో ప్రమాదాలు జరగకుండా చూసే రక్షణ వ్యవస్థలను పరిశీలించారు.
లేటెస్ట్ గ్రీన్ ఎనర్జీ టెక్నాలజీస్, ఆధునిక మైనింగ్ విధానంలో అధికోత్పత్తిని సాధించే భారీ యంత్రాలు, వర్చువల్ రియాలిటీతో రక్షణ చర్యలపై అధ్యయనం చేశారు. అమెరికాలో అతిపెద్ద హూవర్ హైడల్పవర్స్టేషన్ డ్యామ్ ను సందర్శించి, జల విద్యుదుత్పత్తి విధానాలు, రక్షణ చర్యలను తెలుసుకున్నారు. అలాగే, రాష్ట్రంలో పెట్టుబడులు పెట్టాలని పలు కంపెనీలను భట్టి విక్రమార్క ఆహ్వానించారు.
