హైదరాబాద్: ఈ రాష్ట్రం మీది.. మీ కోసమే మేం పని చేస్తున్నామని తెలంగాణ ప్రజలనుద్దేశించి డిప్యూటీ సీఎం భట్టి విక్రమార్క ఆసక్తికర వ్యాఖ్యలు చేశారు. ప్రభుత్వ ఖజానా నుండి ప్రతిపైసా ప్రజల కోసమే ఖర్చు చేస్తున్నామని తెలిపారు. ఇవాళ (అక్టోబర్ 9) హైదరాబాద్లోని ఎల్బీ స్టేడియంలో కొలువుల జాతర కార్యక్రమాన్ని నిర్వహించారు. ఈ కార్యక్రమంలో డీఎస్సీకి సెలెక్ట్ అయిన అభ్యర్థులకు నియామక పత్రాలు అందించారు.
ఈ కార్యక్రమానికి హాజరైన భట్టి మాట్లాడుతూ.. డీఎస్సీ నిర్వహించిన రెండు నెలల్లోనే ఫలితాలు రిలీజ్ చేశామని.. చెప్పిన డేట్కే నియామక పత్రాలు అందిస్తున్నామని గుర్తు చేశారు. గత బీఆర్ఎస్ ప్రభుత్వ హయాంలో విద్యావ్యవస్థ నాశనమైందని.. పదేండ్లు టీచర్ల సమస్యలను గత ప్రభుత్వం పట్టించుకోలేదని విమర్శించారు. మేం అధికారంలోకి వచ్చాక మెగా డీఎస్సీ ప్రకటిస్తే.. నోటిఫికేషన్ అడ్డుకునేందుకు అనేక కుట్రలు చేశారు.. ఆ కుట్రలన్నీ తిప్పికొట్టి విజయవంతంగా పరీక్షలు నిర్వహించామని పేర్కొన్నారు.
ALSO READ | నామోషీగా ఫీలవుతున్నారు.. మొత్తం మార్చేస్తాం: సీఎం రేవంత్ రెడ్డి
అసెంబ్లీ ఎన్నికల్లో నిరుద్యోగులకు ఇచ్చిన హామీ మేరకు జాబ్ క్యాలెండర్ ప్రకటించి నోటిఫికేషన్లు ఇస్తున్నామని స్పష్టం చేశారు. కొట్లాడి తెచ్చుకున్న తెలంగాణలో నిరుద్యోగ యువతకు ఇఫ్పుడు ఉద్యోగాలు వస్తున్నాయని.. ఈ వేదికపై మాట్లాడటం సంతోషంగా ఉందన్నారు. కాంగ్రెస్ సర్కార్ ముఖ్యంగా విద్యపై దృష్టి పెట్టిందని.. విద్యార్థులకు క్వాలిటీ విద్యను అందించాలన్నదే మా తపన అని అన్నారు.
