పబ్లిక్​ హియరింగ్​ లేకుండానే..ఫార్మా కంపెనీకి పర్మిషన్​

• దేశాయిపల్లి ఇండస్ట్రియల్​ పార్క్​లో రెండు నెలలుగా కొనసాగుతున్న పనులు
• విషయం తెలిసి అందోళనకు దిగుతున్న గ్రామస్తులు 
• అనుమతి రద్దు చేయాలని కలెక్టర్‌‌కు వినతి 

మహబూబ్​నగర్/గండీడ్​, వెలుగు : పల్లెలు, వ్యవసాయ పొలాలు ఉండే ప్రాంతాల్లో గ్రీన్​ ఇండస్ట్రీస్‌‌‌‌‌‌‌‌ మాత్రమే ఏర్పాటు చేయాల్సి ఉండగా వాటిస్థానంలో రాష్ట్ర సర్కారు పొల్యుషన్‌‌‌‌‌‌‌‌ వెదజల్లే ఫార్మా కంపెనీలకు అనుమతులు ఇస్తోంది. పబ్లిక్​ హియరింగ్​ నిర్వహించకుండా ఆ కంపెనీలకు భూములు కేటాయిస్తోంది. అందరికీ ఆమోదం ఉందంటూ తప్పుడు రిపోర్టులు ఇస్తూ, మేకిన్​ ఇండియా నుంచి పర్మిషన్లు ఇప్పిస్తోంది. ఈ విషయాన్ని ఆలస్యంగా తెలుసుకున్న సమీప గ్రామాల ప్రజలు ఆందోళనకు దిగుతున్నారు. మహబూబ్​నగర్​ జిల్లా మహమ్మదాబాద్​ మండలం దేశాయిపల్లి గ్రామ శివారులో 1993లో మినీ ఇండస్ట్రియల్​ పార్క్​ను ఏర్పాటు చేశారు. ఈ పార్క్​కు అప్పటి రెవెన్యూ శాఖ మంత్రి కమతం రాంరెడ్డి సర్వే నంబర్​ 460లో 14 ఎకరాల అసైన్డ్​ భూమి కేటాయించారు. పార్క్​ను ఓపెన్​ చేశాక టైర్లు, పశువులు, కోళ్ల దాణా తయారీ ఫ్యాక్టరీలను స్థాపించారు. స్థలం చాలకపోవడంతో అదనంగా మరో 11ఎకరాలకు కేటాయించారు. ఇందులో పేపర్ ప్లేట్స్, పెయింట్ తయారీ పరిశ్రమలు నెలకొల్పారు.‌‌‌‌‌‌‌‌దీనిలో పెయింట్​ తయారీ పరిశ్రమను కొద్ది రోజుల కింద మూసేశారు. ఈ విషయం‌‌‌‌‌‌‌‌బయటికి రాకుండా, ఈ పరిశ్రమకు కేటాయించిన భూమితో పాటు మరికొంత భూమిని టీఎస్ఐఐసీ అధికారులు హైదరాబాద్​కు చెందిన ఓ ఫార్మా కంపెనీకి కేటాయించారు. రెండు నెలల కింద పనులు స్టార్ట్​ చేశారు. ట్యాబ్లెట్ల తయారీకి వాడే ముడి సరుకును ఇక్కడ తయారు చేస్తారని చెప్పడంతో గ్రామస్తులు ఆందోళన చెందుతున్నారు. ఈ ఫ్యాక్టరీని ఏర్పాటు చేయొద్దంటూ ఆందోళన చేస్తున్నారు. 

ప్రజాభిప్రాయ సేకరణ లేకుండానే..

గ్రామాల్లో ఏ పరిశ్రమ స్థాపించాలన్నా ముందుగా ప్రజాభిప్రాయ సేకరణ నిర్వహించాలి. మెజార్టీ ప్రజల అభిప్రాయం మేరకు కంపెనీ ఏర్పాటు చేయాలా? వద్దా? అనే విషయాన్ని ఫైనల్​ చేయాలి. కానీ, దేశాయిపల్లి వద్ద నిర్మిస్తున్న ఫార్మా కంపెనీకి సంబంధించి ఇప్పటి వరకు పబ్లిక్​ హియరింగ్​ నిర్వహించలేదు. గ్రామస్తుల అభిప్రాయం తెలుసుకోకుండా పనులు మొదలు పెట్టారు. పైగా పబ్లిక్​ హియరింగ్​ నిర్వహించినట్లు, మెజార్టీ ప్రజలు ఆమోదం తెలిపినట్లు తప్పుడు రిపోర్టులు సృష్టించారనే టాక్​ వస్తోంది. ఈ రిపోర్టులను మేక్​ ఇన్​ ఇండియాకు పంపించి పర్మిషన్లు తీసుకొచ్చారనే ఆరోపణలున్నాయి. 

ఆందోళనకు దిగుతున్న గ్రామస్తులు..

దేశాయిపల్లిలోని ఇండస్ట్రియల్​ పార్క్​లో ఫార్మా కంపెనీ ఏర్పాటు చేస్తున్నారనే విషయం ఆలస్యంగా తెలుసుకున్న గ్రామస్తులు ఆందోళనకు దిగుతున్నారు. రెండు వారాల కింద మహమ్మదాబాద్​ తహసీల్దార్​​ఆఫీస్​ ఎదుట నిరసన తెలిపి, పనులు నిలిపేయాలని వినతిపత్రం ఇచ్చారు. శుక్రవారం మహబూబ్​నగర్,​- చించోలి రోడ్డుపై బైఠాయించారు. అనంతరం మహబూబ్​నగర్​కు చేరుకొని కలెక్టర్​కు వినతిపత్రం అందించారు. కంపెనీకి ఇచ్చిన పర్మిషన్లు రద్దు చేయాలని కోరారు. ఫార్మా కంపెనీ ఏర్పాటు చేయడం వల్ల ఉమ్మడి గండీడ్​ మండలంలోని నంచర్ల, మొకర్లాబాద్, దేశాయిపల్లి, గాధిర్యాల్, చౌదర్​పల్లి, జులపల్లి, గండీడ్​ మండలంలోని కొమిరెడ్డిపల్లి, ఆశిరెడ్డిపల్లి గ్రామాల్లోని 12 వేల ఎకరాలపై ప్రభావం పడుతుందని ఆందోళన వ్యక్తం చేశారు. ఈ గ్రామాల పరిధిలోని 18 చెరువులు, 258 బోర్లపై ఎఫెక్ట్​ పడుతుందని ఆవేదన వ్యక్తం చేశారు. 

గ్రామస్తులకు బెదిరింపులు..

ఫార్మా కంపెనీ వద్ద ఆందోళనలు చేస్తే కేసులు పెట్టిస్తామని ఓనర్లు బెదిరిస్తున్నారని ప్రజలు ఆవేదన వ్యక్తం చేస్తున్నారు. పర్మిషన్​ తీసుకోవడానికి తాము రూ.2 కోట్లు ఖర్చు చేశామని, అభ్యంతరాలు ఉంటే కోర్టుకు వెళ్లండని కంపెనీ వారు బెదిరిస్తున్నారన్నారు. పైగా కంపెనీ వద్దకు వచ్చి గొడవలు చేసి, ఆస్తులు ధ్వంసం చేస్తే చర్యలు తీసుకుంటామని తమను పోలీస్​ స్టేషన్​కు పిలిపించి పోలీసులు వార్నింగ్ ఇచ్చారని గ్రామస్తులు చెబుతున్నారు.

పొల్యూషన్​ రాదని బాండ్​ రాసిస్తారా?

ఊరి సమీపంలో ఫార్మా కంపెనీ పెడితే పంటలు ఎట్లా పండించుకోవాలి? పశువులు, గొర్రెలను ఎలా కాపాడుకోవాలి? కంపెనీ నుంచి వచ్చే వ్యర్థాలు గ్రౌండ్​ వాటర్​లో కలిస్తే మా పరిస్థితి ఏంటి? ఈ కంపెనీ వల్ల పొల్యూషన్​ ఉండదని మీరేమైనా బాండ్​ రాసిస్తారా? పోలేపల్లి సెజ్​లో పశువులు చస్తున్నా ఎవరూ పట్టించుకోవడం లేదు. మనుషులకు స్కిన్‌‌‌‌‌‌‌‌డిసీజ్​లు వస్తున్నా ఎవరూ మాట్లాడటం లేదు. ఈ కంపెనీ వస్తే రేపు మాకు అదే పరిస్థితి వస్తుంది.‌‌‌‌‌‌‌‌
–గాజుల రాములు, దేశాయిపల్లి

ఫార్మా కంపెనీ మాకొద్దు..

ఫార్మా కంపెనీ మాకు వద్దు. ఈ కంపెనీతో ఎలాంటి ప్రమాదం ఉందో మాకు తెలుసు. ఈ కంపెనీకి బదులు గ్రీన్​ ఇండస్ట్రీస్​కు పర్మిషన్లు ఇవ్వండి. వాటికి మేం వ్యతిరేకం కాదు.‌‌‌‌‌‌‌‌కంపెనీ వాళ్లు దీంతో పొల్యూషన్​ రాదని, అందుకే పర్మిషన్లు వచ్చాయని చెబుతుండ్రు. పర్మిషన్లు రద్దు చేసే వరకు పోరాడుతాం. 
–రఘు యాదవ్, సర్పంచ్, దేశాయిపల్లి