రామాయణంలో రాముడు, సీత తర్వాత గుర్తొచ్చేది హనుమంతుడు. ఈ మధ్య విడుదలైన ‘ఆదిపురుష్’ సినిమాలో కూడా హనుమంతుడి క్యారెక్టర్ చేసిన వ్యక్తి హైలైట్ అయ్యాడు. సినిమా చూస్తున్నంతసేపు హనుమంతుడి క్యారెక్టర్లో నటించిన యాక్టర్ గురించి తెలుసుకోవాలనుకున్న వాళ్లే ఎక్కువ. అతని పేరు... దేవదత్త గజానన్ నగే. మరాఠీ టీవీ ఇండస్ట్రీలో పాపులర్ యాక్టర్. బాలీవుడ్లో ‘తన్హాజీ’ సినిమాలో ‘సూర్యాజీ’ అనే పవర్ఫుల్ రోల్లో కనిపించిన వీర యోధుడు. ఇతని గురించి మరిన్ని విశేషాలు తన మాటల్లోనే...
నా పూర్తి పేరు దేవదత్త గజానన్ నగే. నేను పుట్టి, పెరిగింది మహారాష్ట్రలోని రాయ్గఢ్ జిల్లాలో అలీబాగ్లో. ప్రస్తుతం ముంబయిలో ఉంటున్నా. బి.ఎస్సీ కెమిస్ట్రీ, బ్యాచిలర్ ఆఫ్ లా చదివా. హై స్కూల్ వరకు మా జిల్లాలోనే చదువుకున్నా. పదేండ్లు పారామెడికల్ ఫీల్డ్లో పనిచేశా. ఆ తర్వాత గ్రాడ్యుయేషన్ కోసం ముంబయి వెళ్లా. అక్కడ మోడలింగ్, ఫ్యాషన్ షోల్లో పార్టిసిపేట్ చేశా. కొన్నాళ్లు స్కెచ్ ఆర్టిస్ట్గా కూడా చేశా. నటన మీద ఇంట్రెస్ట్తో మరాఠీ థియేటర్లో యాక్టింగ్ కోర్స్లో చేరా. ఆ తర్వాత 2011లో సీరియల్స్లో నటించే అవకాశం వచ్చింది. అక్కడి నుంచి నా యాక్టింగ్ కెరీర్ మొదలైంది. ‘వీర్ శివాజీ’ అనే టీవీ సీరియల్తో యాక్టింగ్లోకి అడుగుపెట్టా. ఆ సీరియల్లో ‘తానాజీ మలుసరే’ అనే పాత్రలో నటించా. అలాగే ‘జై మల్హర్’ సీరియల్లో ఖండోబా పాత్రలో నటించడంతో ప్రేక్షకులకు మరింత దగ్గరయ్యా. ఫిట్నెస్ మీద ఇంట్రెస్ట్ కాస్త ఎక్కువ నాకు. అందుకే రెగ్యులర్గా జిమ్కి వెళ్లి వర్కవుట్స్ చేస్తుంటా. ఇందులోకి రాకముందు ట్రెక్కింగ్, రివర్ రాఫ్టింగ్ నేర్పించేవాడిని.
కెరీర్
సినిమాల విషయానికి వస్తే 2014లో ‘సంఘర్ష్’ సినిమాతో మరాఠీ సినీ ఇండస్ట్రీలోకి అడుగుపెట్టా. తర్వాత ‘వన్స్ అపాన్ ఏ టైమ్ ఇన్ ముంబై దోబారా’, ‘సత్యమేవ జయతే’, ‘తాన్హాజీ: ది అన్ సంగ్ వారియర్’లో చేశా. ఈ మధ్య విడుదలైన ‘ఆదిపురుష్’ సినిమాలో హనుమాన్ పాత్రలో నటించా. ‘తన్హాజీ’ సినిమాలో మరాఠా యోధుడి పాత్ర నాది. శివాజీ సైన్యంలో కీలకంగా ఉండే సూర్యాజీ రోల్ అది. అందులో సింహగఢ్ యుద్ధంలో కళ్యాణద్వారం దగ్గర అక్కడి ప్రజలతో పోరాడి వాళ్లను అడ్డుకుంటాడు. అలాంటి పవర్ఫుల్ రోల్లో చేయడం నాకు దక్కిన మంచి అవకాశం. ఎందుకంటే అందులో నా నటన చూసి, ప్రేక్షకులతోపాటు విమర్శకులు కూడా ఎంతో మెచ్చుకున్నారు. ఆ తరువాత ఓం రౌత్ నాకు మరో అవకాశం ఇచ్చాడు. ‘ఆది పురుష్’తో ఓంతో రెండో సారి కలిసి పనిచేసే అవకాశం వచ్చింది. నా బాడీ బిల్డింగ్ చూసే ఈ అవకాశం ఇచ్చారనుకుంటా. ఈ షూటింగ్ చేసేటప్పుడు భక్తిగా చేశా. ఇందులో ఉన్న భారీ యాక్షన్ సీక్వెన్స్ చూసిన వాళ్లు థ్రిల్ ఫీలవడం ఖాయం. ఇది నా జీవితాంతం బాగా గుర్తుండిపోతుంది.
ఈ లైఫ్ ఇచ్చింది టీవీనే
టెలివిజన్ నా లైఫ్లో చాలా ఇచ్చింది. సూపర్ హిట్ సీరియల్స్లో నటించా. ప్రజలు ఇప్పటికీ నన్ను ఖండోబా క్యారెక్టర్తో గుర్తుపడతారు. టీవీకి నేను చాలా దగ్గరయ్యా. ఇప్పుడు సినిమాల్లో నటిస్తున్నంత మాత్రాన టీవీని మర్చిపోలేదు. ముందుముందు ఎంత పెద్ద ప్రాజెక్ట్స్లో పని చేసినా టీవీని మాత్రం మర్చిపోను. నాకు గుర్తింపు ఇచ్చింది టీవీనే. అందుకని, ఎప్పటికీ ఆ రెస్పెక్ట్ ఉంటుంది.
‘ఆదిపురుష్’ ఎక్స్పీరియెన్స్
మంచి విజన్ ఉన్న ఫిల్మ్ మేకర్ ఓం. ఆర్టిస్ట్లని ఎక్కువ స్ట్రెస్ చేయడు. అంతేకాకుండా వాళ్ల నుంచి చాలా ఈజీగా తనకు కావాల్సిన పర్ఫార్మెన్స్ని రాబడతాడు. ఆయనతో నాకు ఎమోషనల్ బాండింగ్ ఉంది. ఈ సినిమా ద్వారా ప్రభాస్, సన్నీ సింగ్, కృతి సనన్ మంచి ఫ్రెండ్స్ అయ్యారు. షూటింగ్ మొదలుపెట్టే ముందు ప్రతి రోజు మేం ‘జై శ్రీరాం’ అని నినాదాలు చేసేవాళ్ళం. మనోజ్ ముంతాషిర్ మంచి డైలాగ్స్ రాశాడు. పురాణ కథకు అతని రచన ప్రాణం పోసింది. ‘ఆదిపురుష్’ కంటే ముందే ‘తాన్హాజీ’లో సైఫ్ అలీఖాన్తో కలిసి నటించా. కాబట్టి నాకు ఆయనతో మరోసారి స్క్రీన్ షేర్ చేసుకోవడం చాలా కంఫర్టబుల్గా అనిపించింది.
భాషాభేదం లేదు
నేను మరాఠీ ఇండస్ట్రీ నుంచి వచ్చి హిందీ భాషలో నటిస్తున్నా. ఈ విషయం ఎందుకు చెప్తున్నానంటే నటీనటుల్లో హిందీ, మరాఠీ అనే తేడాలేం లేవు. ఏ నటుడిలో ఎంత సత్తా ఉందో అనేది డైరెక్టర్కి తెలుస్తుంది. దాన్ని బట్టి వాళ్ల సినిమాకు సెట్ అయ్యే వాళ్లను సెలక్ట్ చేసుకుంటారు. మరాఠీ ఇండస్ట్రీ విషయానికొస్తే యాక్టర్స్ ఎక్కువమంది ఫిట్నెస్కి ఇంపార్టెన్స్ ఇస్తారు. అది మంచి మార్పు అనిపిస్తుంది.
మరాఠీలోకి మళ్లీ...
మరాఠీలో అవకాశాలు వస్తే చేయడానికి రెడీగా ఉన్నా. ఇప్పుడు కొన్ని ప్రాజెక్ట్స్ ఉన్నాయి. వాటి గురించి డిస్కషన్స్ అవుతున్నాయి. అలాగే టీవీలో వచ్చే అవకాశాలు ఎక్కువమందికి రీచ్ అవుతాయనేది నా నమ్మకం. అందుకే మళ్లీ టీవీలో చేసే అవకాశం వస్తే రెండో ఆలోచన లేకుండా ఓకే చెప్తా. మళ్లీ టీవీలో ఎప్పుడు కనిపిస్తానా అని ఎదురుచూస్తున్నా. అంతేకాదు.. ‘ఆది పురుష్’ సినిమా షూటింగ్లో ఉన్నప్పుడు కూడా సీరియల్స్ అవకాశాలు కొన్ని వచ్చాయి. ఇప్పుడు సినిమా రిలీజ్ కూడా అయిపోయింది. కాబట్టి ఫ్రీగానే ఉన్నా. త్వరలోనే ఒక షో చేయబోతున్నా. మరో హిస్టారికల్ సినిమాలో నటిస్తున్నా. దాని డీటెయిల్స్ మాత్రం ఇప్పుడే చెప్పను. నా పర్సనల్ లైఫ్ గురించి చెప్పాలంటే... నా భార్య పేరు కంచన్. తను టీచర్. మాకు ఒక కొడుకు ఉన్నాడు. తన పేరు నిహార్ నగే. జీ మరాఠీ ‘ఉత్సవ్ నాట్యంచ అవార్డ్స్ 2015’లో ‘జై మల్హర్’ సీరియల్లో నేను చేసిన రోల్కి అవార్డ్ వచ్చింది” అని ముగించాడు దేవదత్త.
హనుమంతుడితో నాకు ఉన్న బంధం
నేను హనుమంతుడి భక్తుడిని. నాకు ఎక్సర్సైజ్ చేయడం పదిహేడేండ్ల నుంచే అలవాటైంది. నేను వెళ్లిన ఫస్ట్ జిమ్ సెంటర్ పేరు ‘హనుమాన్’. హనుమంతుడిని కొలిచే నేను రామాయణం నేపథ్యంలో తెరకెక్కుతున్న ఈ సినిమాలో హనుమంతుడి పాత్రలో నటించే అవకాశం రావడం నా అదృష్టంగా భావిస్తున్నా. ఈ క్యారెక్టర్ గురించి చెప్పాలంటే... హనుమంతుడిలా కనిపించేందుకు నా శరీరాకృతిని మార్చుకోవడానికి చాలా కష్టపడ్డా. ఎందుకంటే మొదటి నుంచి నాది జిమ్ బాడీనే. కాకపోతే హనుమంతుడిలా కనపడాలంటే సరైన శరీరాకృతి ఉండాలని కష్టపడ్డా. 2011లో ఉన్న బాడీకీ, ఇప్పటికీ చాలా తేడా ఉంటుంది. అప్పటికీ, ఇప్పటికీ వచ్చిన మార్పులను ఫొటోలు తీసి సోషల్ మీడియాలో అప్లోడ్ కూడా చేశా.
జై మల్హర్తో పాపులారిటీ
జై మల్హర్ సీరియల్ మరాఠీలో లాంగ్ రన్నింగ్ షో. ఇది శివుడి అవతారాల్లో ఒకటైన లార్డ్ ఖందోబ అనే పాత్ర మీద ఆధారపడి ఉంటుంది. ఈ సీరియల్ని జై మార్తాండ్’ పేరుతో థాయ్ భాషలోకి డబ్బింగ్ చేశారు. విదేశీ భాషలో డబ్ అయిన మొదటి మరాఠీ సీరియల్ ఇది.
ప్రజ్ఞ
