కొత్తకోట, వెలుగు: పార్టీని నమ్ముకుని కష్ట పడ్డ ప్రతి ఒక్కరికీ పదవులు దక్కుతాయని దేవరకద్ర ఎమ్మెల్యే జి. మధుసూదన్ రెడ్డి తెలిపారు. ఆదివారం పట్టణంలోని బీపీఆర్ గార్డెన్లో ప్రణాళిక సంఘం ఉపాధ్యక్షుడు చిన్నారెడ్డి, ఎమ్మెల్యే సమక్షంలో సీడీసీ చైర్మన్ గా గొల్లబాబు(చంద్రశేఖర్ రెడ్డి) ప్రమాణ స్వీకారం చేశారు. ఈ సందర్భంగా జీఎమ్మార్ మాట్లాడుతూ.. పార్టీ కష్టకాలంలో ఉన్న సమయంలో గొల్లబాబు ఎలాంటి ప్రలోభాలకు లొంగకుండా కాంగ్రెస్ గెలుపు కోసం తనవంతు కృషి చేశారని తెలిపారు.
ఆయన పార్టీకి చేసిన సేవలు గుర్తించి సీడీసీ చైర్మెన్ పదవి అప్పజెప్పిందన్నారు. పదేండ్లు అధికారంలో ఉన్న బీఆర్ఎస్ రాష్ట్రాన్ని అప్పుల కుప్పగా మార్చిందన్నారు. వారు చేసిన అప్పులకు నెలకు రూ.6 వేల కోట్లు కడుతూ ఆరు గ్యారెంటీలను అమలు చేస్తుందన్నారు. దీనిని జీర్ణించుకోలేక ప్రతిపక్ష నేతలు అర్థం లేని విమర్శలు చేస్తున్నారన్నారు. అసత్య ఆరోపణలు చేస్తున్న బీఆర్ఎస్ నేతలకు అభివృద్ధితో సమాధానం చెబుతున్నామని చెప్పారు. మార్కెట్ చైర్మన్ పల్లెపాగ ప్రశాంత్, పార్టీ నేతలు బీచుపల్లి యాదవ్, శ్రీనివాసులు, సాగర్, వేముల శ్రీనివాస్ రెడ్డి, బోయేజ్, ఎల్లంపల్లి నరేందర్, రాములు పాల్గొన్నారు.
