నల్గొండ, వెలుగు : దేవరకొండ నియోజకవర్గంలో మండలి చైర్మన్ గుత్తా సుఖేందర్ రెడ్డి వర్గం దాదాపు ఖాళీ అయింది. కాంగ్రెస్ అభ్యర్థిగా బాలూనాయక్ను ప్రకటించిన తెల్లారే ఆయన వర్గం నేతలు మూకుమ్మడిగా బీఆర్ఎస్కు రాజీనామా చేసి.. కాంగ్రెస్లో చేరారు. దేవరకొండ మున్సిపల్ చైర్మన్ ఆలంపల్లి నర్సింహ, ఎంపీపీ జానీ యాదవ్, మున్సిపల్ మాజీ చైర్మన్ వడ్త్య దేవేందర్నాయక్, రైతుబంధు అధ్యక్షుడు శిరందాసు కృష్ణయ్యతో సహా పలువురు ఎంపీటీసీలు, సర్పంచ్లు బీఆర్ఎస్కు రాజీనామా చేసి శనివారం బాలూనాయక్ ఆధ్వర్యంలో కాంగ్రెస్ కండువా కప్పుకున్నారు. ఎమ్మెల్యే రవీంద్ర కుమార్ నాయక్ను ఓడించి, బాలూనాయక్ విజయానికి కృషి చేస్తామని వారు ప్రకటించారు.
రవీంద్ర కుమార్నాయక్కు, గుత్తా వర్గానికి మధ్య ఎప్పటి నుంచో విభేదాలు ఉన్నాయి. ఇదిలాఉండగా, శనివారం దేవరకొండలో బీఆర్ఎస్ ముఖ్యకార్యకర్తల సమావేశం జరిగింది. మంత్రి జగదీశ్రెడ్డితో పాటు గుత్తా కొడుకు అమిత్ రెడ్డి ఈ సమావేశంలో పాల్గొన్నారు. ఈ మీటింగ్ లోఅమిత్ మాట్లాడుతూ, గత 30 ఏండ్ల నుంచి తన తండ్రితో ఉన్నవారు చిన్నచిన్న సమస్యలను సాకుగా చూపి పార్టీని వీడాలనుకోవడం బాధగా ఉందని, పార్టీకి రాజీనామా చేసే నాయకులు పునరాలోచన చేయాలని కోరారు.
సాగర్లోనూ ఆగని వలసలు..
నాగార్జునసాగర్ నియోజకవర్గంలోనూ వలసల పర్వం కొనసాగుతోంది. ఎమ్మెల్యే నోముల భగత్కు వ్యతిరేకంగా త్రిపురారం మాజీ జడ్పీటీసీ ధన్ సింగ్ యాదవ్ శనివారం జానారెడ్డి సమక్షంలో కాంగ్రెస్లో చేరారు.
