భద్రాచలం, వెలుగు : భద్రాచలంలోని శ్రీసీతారామచంద్రస్వామి దేవస్థానం ఆధ్వర్యంలో నిర్వహిస్తున్న వైకుంఠ ఏకాదశి అధ్యయనోత్సవాల్లో భాగంగా గురువారం భద్రాద్రి రామయ్య కూర్మావతారంలో భక్తులకు దర్శనం ఇచ్చారు. అంతకుముందు స్వామివారిని కూర్మావతారంలో అలంకరించి బేడా మండపానికి తీసుకొచ్చారు. అక్కడ ప్రత్యేక పూజలు నిర్వహించి వేద విన్నపాలు చేశారు. నాళాయర దివ్యప్రబంధం, వేదపారాయణం చేశారు.
ఊరేగింపుగా మిథిలాప్రాంగణంలోని వేదికపైకి తీసుకొచ్చి భక్తులకు దర్శనం కల్పించారు. ఈవో రమాదేవి ఈ పూజా కార్యక్రమాల్లో పాల్గొన్నారు. సాయంత్రం కూర్మావతార రామయ్యకు తిరువీధి సేవ చేశారు. భక్తులు అధిక సంఖ్యలో పాల్గొని స్వామి వారి తీర్థప్రసాదాలు స్వీకరించారు.
