మూడు కొత్త క్రిమినల్ చట్టాలైన భారతీయ న్యాయ సంహిత, భారతీయ నాగరిక్ సురక్ష సంహిత మరియు భారతీయ సాక్ష్యా అధినియం జులై 1వ తేదీ నుంచి అమల్లోకి వచ్చాయి. ఈ సందర్భంగా తెలంగాణ డీజీపీ రవి గుప్తా సోమవారం పోస్టర్లను విడుదల చేశారు. డిజిపి కార్యాలయంలో అధికారులతో కలిసి ఈ పోస్టర్లను డిజిపి ఆవిష్కరించారు. ఈ కొత్త చట్టాలపై ప్రజలకు అవగాహన కల్పించడానికి ఈ పోస్టర్లు అన్ని పోలీస్ స్టేషన్ల వద్ద ప్రదర్శించబడతాయని ఆయన తెలిపారు.
ఈ కార్యక్రమంలో అడిషనల్ డీజీపీ రైల్వేస్ & రోడ్ సేఫ్టీ ఇంచార్జ్ లీగల్ మహేష్ ఏం భగవత్, ఐజిపి మల్టీ జోన్ I & II జి. సుధీర్ బాబు, ఏం.రమేష్, పలువురు సీనియర్ అధికారులు పాల్గొన్నారు. నిజామాబాద్ పోలీస్ కమిషనర్ కల్మేశ్వర్ శింగేనవర్, ఏసీబీ జాయింట్ డైరెక్టర్ రితిరాజ్, డైరెక్టర్ ఆఫ్ ప్రాసిక్యూషన్ శ్రీ మతి వైజయంతిలు కృషి చేశారని వారిని ఈ సందర్భంగా డిజిపి ప్రశంసించారు. కొత్త చట్టాలపై దర్యాప్తు అధికారులకు మార్గనిర్దేశం చేసేందుకు సిఐడి విభాగంలో ఒక కేంద్రాన్ని ఏర్పాటు చేశామని ఆయన అన్నారు.
