లండన్: యూకే పర్యటనలో ఉన్న బెంగాల్ సీఎం మమతా బెనర్జీకి నిరసన సెగ తగిలింది. శుక్రవారం లండన్లోని ఆక్స్ ఫర్డ్‌ యూనివర్సిటీలో ఆమె ప్రసంగిస్తుండగా ఎస్‌ఎఫ్‌ఐ స్టూడెంట్లు కొందరు నినాదాలు చేశారు. జాదవ్పూర్ వర్సిటీ ఘటన, బెంగాల్లో హింస, ఆర్జీకర్ ఆస్పత్రిలో మెడికోపై రేప్ ఘటనలకు సమాధానం చెప్పాలంటూ ప్లకార్డులు ప్రదర్శించారు. వారికి మమతా బెనర్జీ దీటుగా సమాధానం చెప్పారు.
నిరసనలతో తనను భయపెట్టలేరని, తాను రాయల్ బెంగాల్ టైగర్ నని అన్నారు. ‘మీరు చెప్పేదంతా వింటాను ప్రశాంతంగా మాట్లాడండి’ అని సూచించారు. ఆపై వాళ్లు చెప్పినవన్నీ విన్న మమత.. ఆర్టీకర్ కేసును కేంద్రమే దర్యాప్తు చేస్తోందన్నారు. ఇక్కడ రాజకీయాలు చేయొద్దని , ధైర్యం ఉంటే రాష్ట్రానికి వచ్చి రాజకీయం చేయండని వారిని సవాల్ చేశారు. స్టూడెంట్లు వెనక్కి తగ్గకపోవడంతో మమత మరోసారి స్పందించారు. ఆ తర్వాత నిర్వాహకులు నిరసనకారులను బయటకు తీసుకెళ్లగా, మమత ప్రసంగం కొనసాగించారు.
