మహబూబ్నగర్, వెలుగు : మహబూబ్నగర్ లో బుధవారం అర్ధరాత్రి బైపాస్ రోడ్డు సమీపంలోని అక్షర కాలనీలో ఉంటున్న మాధవి ఇంట్లో అరుదైన పామును గుర్తించారు. ఇంట్లో పాము చూసిన ఆమె జడ్చర్లలోని బూర్గుల రామకృష్ణ రావు ప్రభుత్వ డిగ్రీ కాలేజ్ బాటనీ అసిస్టెంట్ ప్రొఫెసర్ బి. సదాశివయ్యకు సమాచారమిచ్చారు. ఆయన వచ్చి పామును పట్టుకున్నారు. సదాశివయ్య మాట్లాడుతూ.. ఈ పాము ఆరుదైన జాతికి చెందినదని, సైంటిఫిక్గా లైకోడాన్ ఫ్లావికల్లిస్ అంటారన్నారు.
కోలుబ్రిడే జాతికి చెందిన ఈ పాము మెడపై పసుపు రంగు పెద్ద మచ్చ ఉండటంవల్ల ఎల్లో కాలర్డ్ వూల్ఫ్ స్నేక్ అని కూడా పిలుస్తారన్నారు. ఇది విషరహిత పాము అని చెప్పారు. 2007లో తమిళనాడులో గుర్తించారన్నారు. తెలంగాణలోనూ 2016లో హైదరాబాద్, వనపర్తిలో కనిపించిందన్నారు.
