- కేటీఆర్ను కోరినఎఫ్డీసీ చైర్మన్ దిల్రాజు
- సంధ్య థియేటర్ ఘటనలోసెటిల్మెంట్ కామెంట్లు బాధాకారం
- సీఎంతో మీటింగ్ రహస్యంగా జరగలేదని వ్యాఖ్య
హైదరాబాద్, వెలుగు: సీఎం రేవంత్ రెడ్డితో సినీ ఇండస్ట్రీ ప్రముఖుల మీటింగ్ చాటుమాటుగా జరగలేదని ఫిల్మ్ డెవలప్మెంట్ కార్పొరేషన్ (ఎఫ్డీసీ) చైర్మన్ దిల్ రాజు అన్నారు. తెలుగు సినీ ఇండస్ట్రీని అనవసరమైన వివాదాల్లోకి లాగొద్దని కేటీఆర్ను ఆయన కోరారు. తమకు లేనిపోని రాజకీయాలు ఆపాదించొద్దని ట్వీట్లో పేర్కొన్నారు. ‘‘రాజకీయ దాడులు, ప్రతి దాడులకు సినిమా ఇండస్ట్రీని ఉపయోగించుకోకండి. సినీ ప్రముఖులతో సీఎం రేవంత్ మీటింగ్ తర్వాత రహస్య ఒప్పందం జరిగిందనడం కరెక్ట్ కాదు. సంధ్య థియేటర్ ఘటనపై సెటిల్మెంట్ అయి ఉండొచ్చని కేటీఆర్ అన్నరు. ఆయన చేసిన కామెంట్లలో నిజం లేదు. కేటీఆర్ అలాంటి కామెంట్లు చేయడం బాధాకరం. సీఎం రేవంత్తో మేమంతా చాటుమాటున కలవలేదు.
మీటింగ్ గురించి అందరికీ తెలుసు. తెలుగు సినీ ఇండస్ట్రీ బాగోగుల గురించి అత్యంత స్నేహపూర్వకంగా, ఎలాంటి దాపరికాల్లేకుండా ఈ భేటీ జరిగింది. రేవంత్ రెడ్డితో జరిగిన మీటింగ్పై చిత్ర పరిశ్రమ చాలా సంతృప్తిగా ఉన్నది. స్టేట్ డెవలప్మెంట్ జర్నీలో తెలుగు సినీ ఇండస్ట్రీ భాగస్వామ్యాన్ని సీఎం గుర్తించారు. రాష్ట్రాభివృద్ధికి, సామాజిక సంక్షేమానికి మా బాధ్యతగా తగిన సహకారం అందించాలని రేవంత్ ఆకాంక్షించారు’’అని దిల్ రాజు పేర్కొన్నారు. హైదరాబాద్ను గ్లోబల్ ఎంటర్టైన్మెంట్ హబ్గా తీర్చిదిద్దాలనే లక్ష్యంతో సీఎం రేవంత్ ముందుకెళ్తున్నారని తెలిపారు. తెలుగు చిత్ర పరిశ్రమ లక్షలాది మందికి జీవనోపాధి కల్పిస్తున్నదని చెప్పారు. ప్రజలతో పాటు ప్రభుత్వాల సహకారం ఎప్పటికీ ఉంటుందనే తాము భావిస్తున్నట్లు పేర్కొన్నారు.
