టీమిండియా క్రికెటర్ తిలక్ వర్మ టీ20 క్రికెట్ లో టాప్ ఫామ్ లో ఉన్నాడు. ఇంగ్లండ్‌‌‌‌తో జరిగిన మూడు మ్యాచ్‌‌‌‌ల్లో తిలక్ వరుసగా 19*, 72*, 18 రన్స్‌ చేశాడు. చెన్నై లో జరిగిన రెండో టీ20లో 72 పరుగులు చేసి మ్యాచ్ విన్నింగ్ ఇన్నింగ్స్ ఆడాడు. అంతకముందు సౌతాఫ్రికా గడ్డపై రెండు సెంచరీలు బాదాడు. బుధవారం(జనవరి 29) విడుదల చేసిన ఐసీసీ ర్యాంకింగ్స్ లో తాజా జాబితాలో తిలక్ ఒక్క ప్లేస్‌ ఎగబాకి రెండో ర్యాంక్‌‌‌‌లోకి దూసుకొచ్చాడు. దీంతో ఇండియన్‌ బ్యాటర్లలో అత్యధిక రేటింగ్‌ పాయింట్లు (832) సాధించిన నాలుగో ప్లేయర్‌‌‌‌గా రికార్డులకెక్కాడు.
తిలక్ వర్మ ఫామ్ పై టీమిండియా మాజీ వికెట్ కీపర్ బ్యాటర్ దినేష్ కార్తీక్ ప్రశంసలు కురిపించాడు. ఈ సందర్భంగా ఐపీఎల్ 2025లో రాయల్ ఛాలెంజర్స్ బెంగళూరు జట్టుపై దయ చూపాలని తిలక్ వర్మను దినేష్ కార్తీక్ సరదాగా కోరాడు. " పరిస్థితులకు తగ్గట్టు తిలక్ వర్మ అద్భుతంగా ఆడాడు. ప్లేయర్ గా అతని ఆట నాకు చాలా ఇష్టం. తిలక్ ఇన్నింగ్స్ కు హ్యాట్సాఫ్. అతను ఇంకా మంచిగా ఆడాలని కోరుకుంటున్నాను. ఆర్సీబీ జట్టుపై తిలక్ వర్మ అద్భుతంగా ఆడతాడు. ఈ సారి సూపర్ ఫామ్ లో ఉన్నాడు. మా జట్టుపై కాస్త దయ చూపండి". అని అని కార్తీక్ క్రిక్‌బజ్‌లో ద్వారా చెప్పుకొచ్చాడు.
ప్రస్తుతం దినేష్ కార్తీక్ సౌతాఫ్రికా ప్రీమియర్ లీగ్ లో పార్ల్ రాయల్స్ తరపున ఆడుతున్నాడు. గురువారం (జనవరి 30) జోబర్గ్ సూపర్ కింగ్స్ పై కీలకమైన హాఫ్ సెంచరీ చేసి తమ జట్టు పార్ల్ రాయల్స్ ను ఆదుకున్నాడు. ఈ మ్యాచ్ లో మొత్తం 39 బంతుల్లో కార్తీక్ నాలుగు ఫోర్లు, మూడు సిక్సర్లతో 53 పరుగులు చేసి టాప్ స్కోరర్ గా నిలిచాడు. మరోవైపు తిలక్ వర్మ శుక్రవారం (జనవరి 31) నాలుగో టీ20 మ్యాచ్ ఆడేందుకు సిద్ధమవుతున్నాడు.
