టీమిండియా మాజీ వికెట్ కీపర్ దినేష్ కార్తీక్ టీ20 క్రికెట్ లో అరుదైన ఘనతను అందుకున్నాడు. అతను అన్ని రకాల టీ20 ఫార్మాట్ లో భారత దిగ్గజ క్రికెటర్ మహేంద్ర సింగ్ ధోనీ పరుగుల రికార్డును బ్రేక్ చేశాడు. ధోనీ టీ20 క్రికెట్ లో 7432 పరుగులు ఉండగా.. కార్తీక్ 7451 పరుగులు చేశాడు. సౌతాఫ్రికా ప్రీమియర్ లీగ్ లో భాగంగా సోమవారం (జనవరి 27) డర్బన్ సూపర్ జెయింట్స్‌పై జరిగిన మ్యాచ్ లో ధోనీని కార్తీక్ వెనక్కి నెట్టాడు. ధోనీ రికార్డ్ బ్రేక్ చేయడానికి కార్తీక్ కు ఈ మ్యాచ్ లో 3 పరుగులు అవసరం కాగా.. 15 బంతుల్లో రెండు సిక్సర్లతో 21 పరుగులు చేశాడు.
ఓవరాల్ గా ధోనీ టీ20 క్రికెట్ లో ధోనీ ఇప్పటివరకు 342 ఇన్నింగ్స్‌లలో 38.11 సగటుతో 7432 చేశాడు. మహేంద్రుడి కెరీర్ లో 28 హాఫ్ సెంచరీలు ఉన్నాయి. స్ట్రైక్ రేట్‌ 135.64 కాగా.. 517 ఫోర్లు, 338 సిక్సర్లు ఉన్నాయి. మరోవైపు దినేష్ కార్తీక్ 361 టీ20 ఇన్నింగ్స్ ల్లో 26.99 సగటుతో 7451 పరుగులు చేశాడు. కార్తీక్ ఖాతాలో 34 హాఫ్ సెంచరీలు ఉన్నాయి. అతని స్ట్రైక్ రేట్‌ 136.84 కాగా..కెరీర్‌లో ఇప్పటివరకు 718 ఫోర్లు, 258 సిక్సర్లు ఉన్నాయి. ఇప్పటికే ఐపీఎల్ కు దినేష్ కార్తీక్ రిటైర్మెంట్ ప్రకటించడంతో అతని రికార్డును ధోనీ ఈ సీజన్ ఐపీఎల్ లో బ్రేక్ చేసే అవకాశం ఉంది.
Also Read :- డివిలియర్స్ రీ ఎంట్రీ కన్ఫర్మ్.. తొలి మ్యాచ్ ఆడేది ఆ జట్టుతోనే
దినేష్ కార్తీక్ ప్రస్తుతం సౌతాఫ్రికా టీ20లీగ్ లో పార్ల్ రాయల్స్ తరపున ఆడుతున్నాడు. తొలి రెండు మ్యాచ్ ల్లో రనౌట్ లు అయ్యాడు. కొన్ని మ్యాచ్ ల్లో అతనికి బ్యాటింగ్ చేసే అవకాశం రాలేదు. దీంతో ఇప్పటివరకు కార్తీక్ కు తన మార్క్ ఇన్నింగ్స్ చూపించే అవకాశం రాలేదు. తమిళనాడుకు చెందిన దినేష్ కార్తీక్ భారత క్రికెట్ తరపున చివరిసారిగా జరిగిన 2022 టీ20 ప్రపంచ కప్ ఆడాడు. ఆస్ట్రేలియా వేదికగా జరిగిన ఈ వరల్డ్ కప్ లో జింబాబ్వేపై తన చివరి మ్యాచ్ ఆడాడు. 2024 సీజన్ లో ఐపీఎల్ కు రిటైర్మెంట్ ప్రకటించాడు.
