మెట్ పల్లి, వెలుగు: గోల్డ్ స్మగ్లింగ్‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌లో భాగస్వామ్యం ఉందనే అనుమానంతో మెట్ పల్లి పట్టణంలోని బంగారు దుకాణాలను డైరెక్టరేట్ ఆఫ్ రెవెన్యూ ఇంటెలిజెన్స్ హైదరాబాద్ అధికారులు సీజ్ చేశారు. వివరాల్లోకి వెళ్తే.. పట్టణంలో కొన్నేండ్లుగా బంగారం వ్యాపారం చేస్తున్న ఓ వ్యాపారికి స్మగ్లింగ్ ముఠాతో సంబంధాలు ఉన్నాయని, వారితో కలిసి నిబంధనలకు విరుద్ధంగా గోల్డ్ రవాణా చేస్తున్నారనే అనుమానంతో డీఆర్ఐ ఆఫీసర్లు గత నెల 28న మెట్ పల్లి కూరగాయల మార్కెట్ సమీపంలోని దుకాణాలను తనిఖీ చేసినట్లు సమాచారం.
వీరి వద్ద సుమారు 5 కేజీల బంగారం స్వాధీనం చేసుకున్నట్లు ప్రచారం జరుగుతోంది. షాపు యజమాని లేకపోవడంతో వర్కర్లతో మాట్లాడి పలు విషయాలపై ఆరా తీసినట్లు తెలిసింది. యజమానికి ఫోన్ చేసినా స్పందించకపోవడంతో 3 షాపులను సీజ్ చేశారు. అనంతరం షాపు గోడలపై నోటీసులు అతికించారు. దీంతోపాటు రెండు నెలల కింద మెట్ పల్లికి చెందిన ఓ వ్యాపారి కారులో గోల్డ్ తీసుకొస్తుండగా, కర్నాటక బార్డర్ లో పోలీసులు పట్టుకున్నారు.
జిల్లాకు చెందిన ఓ అధికారి అక్కడి అధికారితో మాట్లాడి సెటిల్మెంట్ చేసి పట్టుబడిన బంగారం విడిపించినట్లు ప్రచారం జరిగింది. కాగా డీఆర్ఐ పోలీసులు దుకాణాలను సీజ్ చేయడం పట్టణంలో కలకలం రేపింది. ఈ విషయమై స్థానిక పోలీసులను సంప్రదించగా బంగారం దుకాణాల సీజ్ విషయం తమకు తెలియదని చెప్పడం గమనార్హం.
