క్రికెట్ ప్రేమికులకు ప్రముఖ ఓటీటీ సంస్థ డిస్నీ ప్లస్ హాట్‌స్టార్ గుడ్ న్యూస్ చెప్పింది. ఐసీసీ వ‌న్డే వ‌ర‌ల్డ్ క‌ప్ 2023, ఆసియా క‌ప్ 2023 టోర్నీలను.. మొబైల్‌లో ఫ్రీ లైవ్స్ట్రీమింగ్ అందించనుంది. అంటే ఈ టోర్నీ మ్యాచులను ఉచితంగా వీక్షంచడానికి ఎలాంటి సబ్‌స్క్రిప్షన్ అక్కర్లేదన్నమాట. ఈ రెండు మెగా టోర్నీలను క్రికెట్ అభిమానులు ఉచితంగా త‌మ మొబైల్‌లో చూసుకోవ‌చ్చు.
ఇటీవల ఐపీఎల్ మ్యాచులను ఓటీటీ ఫ్లాట్‌ఫామ్‌ జియో సినిమా ఫ్రీగా లైవ్ చేసిన విష‌యం తెలిసిందే. ఈ నిర్ణయంతో జియో సినిమాకు రికార్డు స్థాయిలో వ్యూయర్ షిప్ పెరిగింది. ప్రతి మ్యాచును ఏవరేజ్‌గా 2కోట్ల మంది వీక్షించగా, ఐపీఎల్-16 ఫైనల్ మ్యాచును ఏకంగా 3 కోట్ల మంది యూజర్లు మొబైల్‌లలో వీక్షించారు. జియో కొట్టిన ఈ దెబ్బతో టెలివిజన్ వ్యూయర్ షిప్ గణనీయంగాతగ్గింది. ఈ క్రమంలోనే హాట్ స్టార్ ఈ నిర్ణయం తీసుకుంది. హాట్ స్టార్ తీసుకున్న ఈ నిర్ణయంతో దాదాపు 54 కోట్ల మంది యూజర్లకు ప్రయోజనం దక్కనుంది.
భారత గడ్డపై అక్టోబ‌ర్ 5 నుంచి న‌వంబ‌ర్ 19 వ‌ర‌కు ఐసీసీ వ‌న్డే వరల్డ్కప్ జ‌ర‌గ‌నుంది. ఇక ఆసియాకప్ టోర్నీకి సంబంధించి అధికారిక ప్రకటన లేనప్పటికీ.. సెప్టెంబ‌ర్ 2 నుంచి 13 వ‌ర‌కు జ‌రిగే అవ‌కాశాలు ఉన్నాయి.
