- తాను బతుకమ్మ ఆట స్థలం పరిశీలనకు వచ్చానని చెప్పినా వినిపించుకోని జనం
- వరంగల్లోని ఎస్సార్ నగర్ లో ఘటన
- అధికారితో వాగ్వాదం.. గంటపాటు ఆందోళన
- పోలీస్ స్టేషన్లో పలువురిపై ఫిర్యాదు
వరంగల్ సిటీ, వెలుగు: వరంగల్లోని ఎస్సార్నగర్ కాలనీలో బతుకమ్మ ఆట స్థలం పరిశీలనకు వచ్చిన తహసీల్దార్ ఇక్బాల్ను కాలనీవాసులు మంగళవారం అడ్డుకున్నారు. ఆయన ప్రయాణిస్తున్న కారు ముందుకు కదలకుండా అడ్డుగా నిల్చొని తమ ఇండ్లు కూల్చవద్దంటూ ఆందోళనకు దిగారు. కొందరైతే ఏకంగా ఆయన కాళ్ల మీద పడి వేడుకున్నారు. ఊహించని ఈ పరిణామంతో ఖంగుతిన్న తహసీల్దార్.. తాను బతుకమ్మ ఆట స్థలం పరిశీలనకు వచ్చానని, తాము ఇండ్లను కూల్చబోవడం లేదని చెప్పినా ఎవరూ వినిపించుకోలేదు.
దీంతో తీవ్ర ఉద్రిక్తత చోటుచేసుకుంది. కాగా, స్థానికంగా ఉన్న ఓ బీఆర్ఎస్ నేత ఇండ్లు కూల్చేందుకు వస్తున్నారంటూ చేసిన తప్పుడు ప్రచారం వల్లే ఈ ఘటన జరిగినట్లు పోలీసులు అంచనాకు వచ్చారు. తహసీల్దార్, ఏనుమాముల పోలీసుల కథనం ప్రకారం.. వర్ధన్నపేట ఎమ్మెల్యే కేఆర్.నాగరాజు ఆదేశానుసారం తహసీల్దార్ వరంగల్ ఎస్సార్ నగర్ 14వ డివిజన్లో బతుకమ్మ ఆడే స్థలాన్ని పరిశీలించేందుకు తన సిబ్బందితో కలిసి వచ్చారు. దీంతో స్థానికులు పెద్ద ఎత్తున గుమిగూడి వాహనాన్ని ముందుకు కదలకుండా అడ్డగించారు. అందులో కొందరు కారు అద్దాలను పగలగొట్టేందుకు ప్రయత్నించారు. అసలు ఏంజరుగుతుందో తెలియక తహసీల్దార్ కారు దిగడంతో కాలనీవాసులు ఆయనతో వాగ్వాదానికి దిగారు.
మా ఇండ్లను కూలగొట్టేందుకే వచ్చారా.. అంటూ ప్రశ్నించారు. కాగా, తాను విధుల్లో భాగంగా ఎమ్మెల్యే నాగరాజు ఆదేశాల మేరకు బతుకమ్మ ఆట స్థలాన్ని పరిశీలించేందుకు మాత్రమే వచ్చినట్లు ఇక్బాల్ ఎంత చెప్పినా వినిపించుకోలేదు. అక్కడున్న వారిలో కొందరు అధికారిపై ఆగ్రహంతో ముందుకువెళ్లగా.. మరికొందరు మాత్రం తమ ఇండ్లజోలికి రావొద్దంటూ అధికారి కాళ్లు మొక్కుతూ బతిమిలాడారు. దీంతో దాదాపు గంట పాటు ఉద్రిక్తత వాతావరణం నెలకొంది. తహసీల్దార్ తన సిబ్బందితో కలిసి సమీపంలోని ఏనుమాముల పోలీస్ స్టేషన్ కు వెళ్లి తమ విధులను అడ్డగించిన వారిపై లిఖితపూర్వకంగా ఫిర్యాదు చేశారు.
కఠిన చర్యలు తీసుకోవాలి
హైదరాబాద్: వరంగల్ అర్బన్ తహసీల్దార్ ఇక్బాల్‌పై దాడికి యత్నించిన వారిపై కఠిన చర్యలు తీసుకోవాలని తెలంగాణ త‌హ‌సీల్దార్స్ అసోసియేషన్ (టీజీటీఏ) రాష్ట్ర అధ్యక్ష, కార్యదర్శులు ఎస్. రాములు, రమేశ్పాక్ డిమాండ్ చేశారు. త‌హ‌సీల్దార్‌తో అనుచితంగా ప్రవర్తించిన వారిపై కేసు నమోదు చేయాలని ఒక ప్రకటనలో ప్రభుత్వానికి విజ్ఞప్తి చేశారు.
బీఆర్ఎస్ నేత తప్పుడు ప్రచారం వల్లే..
ఉన్నతాధికారుల ఆదేశానుసారం విధుల్లో తమ సిబ్బందితో పాటు తన కారుపై దాడికి యత్నం చేశారని తహసీల్దార్ ఇక్బాల్ చెబుతుండగా.. హైదరాబాద్లో మాదిరిగా ఎస్సార్ నగర్ లో సైతం ఇండ్లను కూల్చేందుకు తహసీల్దార్ వచ్చాడనే సమాచారంతోనే తాము తహసీల్దార్ కారును అడ్డగించామని స్థానికులు తెలిపారు. కాగా, ఈ ఆందోళనకు ఎస్సార్ నగర్ కు చెందిన బీఆర్ఎస్ నేత కేతిరి రాజశేఖర్తో పాటు ఇద్దరు చేసిన తప్పుడు ప్రచారమే కారణమని పోలీసులు ప్రాథమికంగా గుర్తించారు. అధికారులు, సిబ్బంది ఫిర్యాదు మేరకు కేతిరి రాజశేఖర్, కేతిరి లావణ్యపై కేసు నమోదు చేసి దర్యాప్తు చేస్తున్నట్లు ఏనుమాముల సీఐ రాఘవేందర్ తెలిపారు.
