మహబూబ్నగర్ జిల్లాలో ఎమ్మెల్యేల పనితీరుపై అసంతృప్తి

మహబూబ్నగర్, వెలుగు : మహబూబ్నగర్ జిల్లాలో ఎమ్మెల్యేల పనితీరుపై ఇంటా బయట అసంతృప్తి వ్యక్తమవుతోంది. మూడు నియోజవర్గాల్లో వరుసగా రెండు సార్లు ఎమ్మెల్యేలుగా గెలుపొందిన లీడర్లు ‘హ్యాట్రిక్’ కోసం ప్రయత్నిస్తున్నా, ప్రజలు, సొంత పార్టీ కేడర్ నుంచే వ్యతిరేకత వస్తోంది. ఉద్యమ లీడర్లు, పాత కేడర్ను పక్కన పెట్టి కొత్త వారికి ప్రయారిటీ ఇస్తున్నారనే విమర్శలున్నాయి. ఎన్నికల్లో పాలమూరుకు సీఎం కేసీఆర్ ఇచ్చిన హామీలు నెరవేరకపోవడం, డబుల్ బెడ్రూం ఇండ్లు, దళితబంధు లాంటి స్కీములు బీఆర్ఎస్ లీడర్లు, వాళ్ల అనుచరులకే దక్కడం రూలింగ్ పార్టీకి మైనస్గా మారింది. అటు బీజేపీ, కాంగ్రెస్లోనూ వర్గపోరు ఆ పార్టీల కేడర్ను కలవరపెడ్తోంది.

మంత్రి శ్రీనివాస్గౌడ్పై పలు ఆరోపణలు..

మహబూబ్నగర్ నుంచి వి.శ్రీనివాస్గౌడ్ 2014 , 2018లో ఎమ్మెల్యేగా గెలుపొంది, 2018లో మంత్రి అయ్యారు. పాలమూరు నియోజకవర్గంలో వివిధ అభివృద్ధి పనులు ప్రారంభించినా.. సుందరీకరణ పనులు మినహా ఏవీ కంప్లీట్ కాలేదు. అరకొరగాపూర్తయిన డబుల్ బెడ్ రూమ్ ఇండ్లను అర్హులకు కాకుండా బీఆర్ఎస్ లీడర్లు, వారి అనుచరులకు ఇచ్చుకున్నారనే ఆరోపణలు వచ్చాయి. భూ వివాదాల్లోనూ మంత్రిపై తరుచూ ఆరోపణలు వస్తున్నాయి. సెకండ్ కేడర్ లీడర్లను ఎదగనివ్వకుండా అడ్డుకుంటున్నారనే విమర్శలున్నాయి. బహిరంగంగా చెప్పకున్నా మండల నాయకల్లోనూ వ్యతిరేకత ఉంది. ముందు నుంచీ పార్టీ కోసం, తెలంగాణ ఉద్యమంలో పని చేసిన వారిని పక్కకు పెట్టారనే టాక్ వినిపిస్తోంది . కొద్ది రోజుల కింద జి.మధుసూదన్రెడ్డి కాంగ్రెస్ పార్టీ జిల్లా అధ్యక్షుడిగా బాధ్యతలు తీసుకున్నారు. చార్జ్ తీసుకున్నాక ఆయన పాలమూరుకంటే సొంత నియోజకవర్గం దేవరకద్రపైనే ఫోకస్ పెట్టడంతో మహబూబ్నగర్లో పార్టీకి పెద్ద దిక్కు లేకుండా పోయారు. మహబూబ్నగర్ నియోజకవర్గం నుంచి వచ్చే ఎన్నికల్లో కాంగ్రెస్ నుంచి ఎవరు పోటీలో ఉంటారనేదానిపై ఇప్పటివరకు క్లారిటీ లేదు. బీసీ లీడర్ సంజీవ్ ముదిరాజ్ పోటీ చేసే అవకాశం ఉన్నా.. సామాజిక వర్గాల సమీకరణాల ప్రకారం ఈ సీటును మైనార్టీ వర్గాలకు ఇచ్చే చాన్స్ ఉన్నట్లు ప్రచారం జరుగుతోంది. బీజేపీ నుంచి మాజీ ఎంపీ జితేందర్రెడ్డి ఇక్కడి నుంచి పోటీ చేస్తారని ఇటీవల చర్చ జరిగినా, ఆయన పార్లమెంట్స్థానానికి పోటీ చేసే ఆలోచనలో ఉన్నట్లు తెలుస్తోంది. మాజీ ఎమ్మెల్యే యెన్నం శ్రీనివాస్రెడ్డి కూడా ఈసారి పోటీలో ఉంటారనే టాక్ ఉన్నా.. ఆయన చాన్నాళ్లుగా జనాలకు దూరంగా ఉంటున్నారనే అపవాదు ఉంది. ఇటీవల పార్టీలో చేరిన బీసీ లీడర్ ఎన్పీ వెంకటేశ్ కూడా టికెట్పై ఆశలు పెట్టుకున్నారు. హైకమాండ్ గ్రీన్ సిగ్నల్ఇస్తే పోటీ చేసేందుకు రెడీగా ఉన్నట్లు ఆయన అనుచరులు చెప్పుకుంటున్నారు.

అభివృద్ధిలో వెనుకబడిన జడ్చర్ల..

జడ్చర్ల ఎమ్మెల్యే సి.లక్ష్మారెడ్డి వరుసగా రెండు సార్లు ఎమ్మెల్యేగా గెలిచి, ప్రస్తుతం పాలమూరు బీఆర్ఎస్ జిల్లా అధ్యక్షుడిగా వ్యవహరిస్తున్నారు. ఆయనకు సౌమ్యుడిగా పేరున్నప్పటికీ డెవలప్మెంట్లో జడ్చర్ల వెనుకబడిందనే టాక్ నడుస్తోంది. వంద పడకల హాస్పిటల్ కట్టించి ఏడాదిన్నర కావస్తున్నా.. ఇంత వరకు ప్రారంభించలేదు. పీఆర్ఎల్ఐలో భాగమైన ఉదండాపూర్ రిజర్వాయర్ అసంపూర్తిగా ఉండడంతో పాటు బాధితులకు పరిహారం, ఆర్అండ్ఆర్ ప్యాకేజీ విషయంలో అన్యాయం చేశారనే ఆరోపణలు ఉన్నాయి. ఆయన సెకండ్ కేడర్ లీడర్లను తప్ప, గ్రామ, మండల స్థాయి లీడర్లను పట్టించుకోరనే విమర్శలు ఉన్నాయి. సొంత పార్టీలోనే లక్ష్మారెడ్డికి వ్యతిరేక వర్గం పని చేస్తోంది. పాలమూరు ఎంపీ మన్నె శ్రీనివాస్రెడ్డి అన్న కొడుకు మన్నె జీవన్రెడ్డి వచ్చే ఎన్నికల్లో జడ్చర్ల అసెంబ్లీ టికెట్ కోసం పట్టుబడుతున్నారనే టాక్ ఉంది. ఇప్పటికే గ్రౌండ్ వర్క్ కూడా స్టార్ట్ చేసినట్లు తెలిసింది. కొద్ది రోజుల కింద జడ్చర్ల అసెంబ్లీ స్థానం నుంచి బీఆర్ఎస్ పార్టీ తరఫున ఎవరు బరిలో ఉండాలనే దానిపై ఎగ్జిట్ పోల్స్ కూడా నిర్వహించడం విశేషం. దీనికి తోడు ఇటీవల జడ్చర్ల మున్సిపాలిటీకి చెందిన కొందరు బీఆర్ఎస్ కౌన్సిలర్లు ప్లాట్లు, భూ కబ్జాలు చేస్తున్నారని బాధితులు ఆందోళనకు దిగడం, ఇందులో ఎమ్మెల్యే అనుచరులే ఉన్నారని ప్రెస్ మీట్లో చెప్పడం దూమారం రేపింది. కాంగ్రెస్ పార్టీ నుంచి టీపీసీసీ జనరల్ సెక్రెటరీ జనంపల్లి అనిరుధ్రెడ్డి జడ్చర్ల నుంచి పోటీ చేసేందుకు తీవ్ర ప్రయత్నాలు చేస్తున్నారు. ప్రజలకు దగ్గరయ్యేందుకు డిసెంబర్ 30న మ్యూజికల్ నైట్, సంక్రాంతి సందర్భంగా ముగ్గుల పోటీలు నిర్వహించారు. పరిశ్రమలు వదిలే కాలుష్యం, భూ బాధితులు చేస్తున్న ఆందోళనకు మద్దతుగా నిలుస్తున్నారు. కానీ, బీసీ వర్గానికి చెందిన ఎర్ర శేఖర్ బీజేపీ నుంచి కాంగ్రెస్లో చేరినప్పటి నుంచి కాంగ్రెస్ రెండుగా చీలిపోయింది. వేర్వేరుగా కార్యక్రమాలు నిర్వహిస్తూ, బహిరంగంగానే విమర్శలు, ప్రతి విమర్శలు చేసుకుంటుండటంతో కేడర్ నిరుత్సాహంలో ఉంది. బీజేపీ నుంచి బాలా త్రిపుర సుందరి పోటీ చేసేందుకు హైకమాండ్ వద్ద పట్టుబడుతున్నారు. తరచూ నియోజకవర్గంలో పర్యటిస్తూ ప్రజల సమస్యలు తెలుసుకుంటున్నారు. కానీ, సొంత పార్టీ లీడర్లే ఈమెను అడ్డుకుంటున్నారు. ఎక్కడికి వెళ్లినా సపోర్ట్ చేయకపోవడం ప్రతికూల అంశంగా మారింది. సొంతంగా కార్యక్రమాలను నిర్వహించినా తనకు ఎలాంటి పదవి లేదని చెప్పి కేడర్ను వెళ్లనివ్వకుండా అడ్డుకుంటుండడం ప్రతికూలంగా మారింది.

అవినీతి అక్రమాల్లో దేవరకద్ర ఎమ్మెల్యే అనుచరులు..

దేవరకద్ర నియోజకవర్గం నుంచి వరుసగా రెండు సార్లు గెలిచిన ఎమ్మెల్యే ఆల వెంకటేశ్వర్రెడ్డి, మూడో సారి గెలుపు కోసం ప్రయత్నాలు చేస్తున్నారు. ముందు నుంచి ఉన్న వారిని కాకుండా.. ఒక సామాజిక వర్గానికి చెందిన లీడర్లకే ప్రయారిటీ ఇస్తున్నారనే టాక్ ఉంది. ఇతర వర్గాలకు చెందిన సెకండ్ లీడర్లు, పబ్లిక్ ఏ పని కోసం వెళ్లినా.. ఆయన సపోర్ట్ చేస్తున్న సామాజిక వర్గం లీడర్ వద్దకే వెళ్లాలని సూచిస్తుండటంతో తీవ్ర వ్యతిరేకత వస్తోంది. నియోజకవర్గ కేంద్రానికి మంజూరు చేసిన డిగ్రీ కాలేజ్ సూర్యపేట జిల్లాకు తరలిపోవడం విమర్శలు దారి తీసింది. పదేండ్లు కావస్తున్నా రైల్వే ఓవర్ బ్రిడ్జి పూర్తి కాకపోవడం ప్రతికూల అంశంగా మారింది. ఊకచెట్టువాగు పొంటి నియోజకవర్గంలో దాదాపు 22 వరకు చెక్ డ్యామ్లు నిర్మించినా, వీటి పరిధిలో బీఆర్ఎస్ లీడర్లు ఇసుక అక్రమ రవాణా చేస్తున్నారనే ఆరోపణలు ఉన్నాయి. ఇవి కాకుండా అక్రమ మైనింగ్, మట్టి మాఫియాలో బీఆర్ఎస్ లీడర్లు కీ రోల్ పోషిస్తుండడం విమర్శలకు దారి తీస్తోంది. అలాగే ఈసారి బీఆర్ఎస్ నుంచి దేవరకద్ర అసెంబ్లీ టికెట్కోసం మహబూబ్నగర్ డీఎస్పీగా పని చేసిన కిషన్ గౌడ్ ప్రయత్నాలు చేస్తున్నారనే చర్చ ఉంది. నాలుగు నెలలుగా ఈయన అడ్డాకుల, మూసాపేట, కొత్తకోట, మదనాపురం, దేవరకద్ర మండలాల్లో తయన అనుచరులతో గ్రౌండ్ వర్క్ స్టార్ట్ చేశారు. కాంగ్రెస్ పార్టీ నుంచి పాలమూరు డీసీసీ అధ్యక్షుడు జి.మధుసూదన్రెడ్డి పోటీ చేస్తారనే టాక్ ఉన్నా.. టీడీపీకి చెందిన మాజీ ఎమ్మెల్యేలు కొత్తకోట దయాకర్రెడ్డి, సీతమ్మ దంపతుల్లో ఒకరు పోటీ చేస్తారనే చర్చ సాగుతోంది. బీజేపీ నుంచి నిరుడు ఎన్నికల్లో పోటీ చేసిన డోకూరు పవన్కుమార్రెడ్డి పోటీకి రెడీ అవుతున్నారు. సానుభూతితో పాటు ఎమ్మెల్యేపై ఉన్న వ్యతిరేకతను అనుకూలంగా మార్చుకునేందుకు ట్రై చేస్తున్నారు. ఈ క్రమంలో ఇప్పటి నుంచే నియోజకవర్గంలో విస్తృతంగా పర్యటిస్తున్నారు. ఈయనతో పాటు బీసీ సామాజిక వర్గానికి చెందిన ఎగ్గని నర్సింహులు సామాజిక వర్గాల ఈక్వేషన్స్ తెరమీదకు వస్తే తనకు టికెట్ వస్తుందనే ఆశతో ఉన్నారు. ఈ క్రమంలో ఆయన కూడా సొంతంగా పర్యటనలు చేస్తూ, ప్రజలకు టచ్లో ఉన్నారు.

2018లో ప్రధాన పార్టీలకు వచ్చిన ఓట్లు