నాంపల్లి/చౌటుప్పల్, వెలుగు: మునుగోడు నియోజకవర్గంలో మంగళవారం సాయంత్రం 6 గంటలకు ఎన్నికల ప్రచారం ముగిసిందో లేదో ప్రలోభాల పర్వం మొదలైంది. ప్రధాన పార్టీలకు చెందిన నేతలు ఓటర్లకు నగదు, చికెన్, మద్యం పంపకాలు చేపడుతున్నారు. ఓ ప్రధాన పార్టీ ఒక్కో ఓటరుకు రూ.3వేల చొప్పున పంచుతుండడంతో, మరో పార్టీ అంతే మొత్తం పంచేందుకు సిద్ధమవుతున్నట్లు చెప్పుకుంటున్నారు. ఈ క్రమంలో మంగళవారం పలుచోట్ల ఓటర్లకు మద్యం, చికెన్ పంచేందుకు రూలింగ్పార్టీ లీడర్లు సిద్ధమవుతుండగా పోలీసులు పట్టుకున్నారు. నాంపల్లి మండలంలో పస్నూర్ లో టీఆర్ఎస్ పార్టీ మాజీ సర్పంచ్ పోగుల వెంకటరెడ్డి ఇంట్లో రూ.92వేల నగదు, లక్షా 25 వేల విలువగల మద్యం పట్టుబడినట్లు సీఆర్ఎఫ్ డీఎస్పీ సోఫ్నిల్ తెలిపారు.
వెంకటరెడ్డి ఇంట్లో గంట పాటు సోదాలు నిర్వహించారు. భారీ మొత్తంలో కూల్ డ్రింక్స్, వాటర్ బాటిల్స్ స్వాధీనం చేసుకుని సంబంధిత శాఖలకు పంపించినట్లు తెలిపారు. గోడగడియారాలు, గొడుగులు కూడా దొరికినట్టు తెలిసింది. యాదాద్రి భువనగిరి జిల్లా నారాయణపురం మండలంలోని స్థితియతండాకు చెందిన టీఆర్ఎస్ కార్యకర్తలు 80 కిలోల చికెన్ తరలిస్తూ ఉండగా పోలీసులు పట్టుకున్నారు. చౌటుప్పల్ మండల తుప్రాన్పేటలో వెహికల్ స్టెఫ్నీ టైర్లో తరలిస్తున్న రూ.93.49 లక్షల నగదును పోలీసులు స్వాధీనం చేసుకున్నారు. పోలీసుల కథనం ప్రకారం..హైదరాబాద్ గచ్చిబౌలి కి చెందిన రాజీవ్ యాదవ్ అనే బీజేపీ లీడర్, హిమాయత్ నగర్ కు చెందిన మైసి నాందేవ్ ద్వారా రూ. 93. 49 లక్షల నగదును చౌటుప్పల్ తరలించేందుకు ఒప్పందం చేసుకున్నాడు. క్యాష్ను స్టెఫ్నీ టైర్లో పెట్టుకొని నాందేవ్ చౌటుప్పల్ బయలు దేరాడు. పోలీసులు తూప్రాన్ పేట్ చెక్పోస్ట్ వద్ద నాందేవ్ వస్తున్న ఏపీ 09 సీఏ 3339 స్కార్పియో వాహనాన్ని తనిఖీ చేశారు. స్టెఫ్టీ టైర్ను పరిశీలించిన పోలీసులు అందులో డబ్బు ఉన్నట్టు గుర్తించి, సీజ్ చేశారు. నగదుతోపాటు వాహనాన్ని పోలీస్ స్టేషన్కు తరలించారు.
