ఓటింగ్ శాతం పెంపుపై యంత్రాంగం ఫోకస్

అత్యల్పంగా నమోదైన కేంద్రాలపై స్పెషల్ నజర్
స్వీప్ ఆధ్వర్యంలో అవగాహన కార్యక్రమాలు
కలెక్టర్, ఎస్పీ ప్రత్యేక చొరవ

కామారెడ్డి, వెలుగు: పార్లమెంట్ ఎన్నికల్లో ఓటింగ్ శాతాన్నిపెంచడంపై జిల్లా యంత్రాంగం ఫోకస్ పెట్టింది. అసెంబ్లీ ఎన్నికల్లో తక్కువ ఓటింగ్ నమోదైన కేంద్రాలను గుర్తించి వీటి పరిధిలోని ఓటర్లను చైతన్యం చేస్తున్నారు. 2023 అసెంబ్లీ ఎన్నికల్లో జిల్లాలో 50 శాతం పోలింగ్ నమోదైన కేంద్రాలను గుర్తించారు. ఈ పోలింగ్ కేంద్రాల్లో సిస్టమెటిక్ ఓటర్స్ ఎడ్యుకేషన్ అండ్ ఎలక్టోరల్ పార్టీసిపేషన్ (స్వీప్) ద్వారా ప్రత్యేక అవగాహన కార్యక్రమాలు చేపడుతున్నారు. జిల్లాలోని నాలుగు నియోజకవర్గాల్లో 1,049 పోలింగ్ కేంద్రాలున్నాయి.

అసెంబ్లీ ఎన్నికల్లో ఎల్లారెడ్డి నియోజకవర్గంలో అత్యధికంగా 83.16 శాతం, జుక్కల్లో 81.86 శాతం, బాన్సువాడలో 81.26 శాతం, కామారెడ్డిలో 74.86 శాతం పోలింగ్ నమోదైంది. వీటి పరిధిలోని 10 పోలింగ్ కేంద్రాల్లో అత్యల్పంగా ఓటింగ్ శాతం నమోదైంది. ఈ పోలింగ్ కేంద్రాల్లో పార్లమెంట్ఎన్నికల్లో పోలింగ్ శాతాన్ని పెంచాలని ఉన్నతాధికారులు జిల్లా యంత్రాంగానికి సూచించారు. దీంతో జిల్లా యంత్రాంగం 18 ఏండ్లు నిండిన ప్రతిఒక్కరు ఓటరుగా నమోదు చేయిస్తున్నారు. ఓటర్లందరూ ఓటుహక్కు వినియోగించుకోవడం, ఈవీఎంల వినియోగంపై స్వీప్ ద్వారా ప్రోగ్రామ్స్ నిర్వహిస్తున్నారు. మహిళా సంఘాల్లోని సభ్యులు, కాలేజీల్లో యువతకు ఓటు హక్కుపై అవగాహన కార్యక్రమాలు చేపడుతున్నారు.

కలెక్టర్, ఎస్పీ చొరవ

పోలింగ్ శాతం పెంచడంపై కలెక్టర్ జితేశ్ వీ పాటిల్, ఎస్పీ సింధూ శర్మ స్పెషల్ ఫోకస్ పెట్టారు. శుక్రవారం కామారెడ్డి జిల్లా కేంద్రంలోని శ్రీరాంనగర్ కాలనీలో (255 పోలింగ్ కేంద్రం), వడ్డెర కాలనీలో (214 పోలింగ్ కేంద్రం)లో స్థానికులతో మీటింగ్ నిర్వహించి ఓటుహక్కు ఆవశ్యకతను వివరించారు. ఆయా కేంద్రాల్లో ఓటింగ్ శాతం తక్కువగా ఉండడానికి కారణాలను స్థానికులను అడిగి తెలుసుకున్నారు. ప్రధానంగా కిరాయిదారులు, ఇతర ఏరియాల్లో ఉంటున్న వారు ఓటేసేందుకు రాకపోవడంతో తక్కువ ఓటింగ్ నమోదైందని అభిప్రాయానికి వచ్చారు.

ఒకే ఇంట్లోని వ్యక్తులకు వేర్వేరు పోలింగ్ కేంద్రాల్లో ఓట్లు రావడం, చనిపోయిన వ్యక్తులతో పాటు, కొందరికి రెండు చోట్ల ఓట్లు ఉండడం కూడా పోలింగ్ శాతం తగ్గడానికి కారణాలుగా భావిస్తున్నారు. అయితే ఈ ఎన్నికల్లో ఓటర్లుగా నమోదై ఉన్న ప్రతి ఒక్కరు ఓటేసేలా చర్యలు తీసుకోవాలని ఆఫీసర్లకు సూచించారు. 80 ఏండ్లు దాటిన వృద్ధులు, దివ్యాంగులు ఇంటి నుంచే ఓటేసేలా అవగాహన కల్పిస్తున్నారు.

గత పార్లమెంట్ ఎన్నికల్లో ఇలా..

2019 పార్లమెంట్ ఎన్నికల్లో జహీరాబాద్ సెగ్మెంట్లో 69.67 శాతం ఓటింగ్ శాతం నమోదైంది. 14,97,992 మంది ఓటర్లకు గాను 10,43,704 మంది మాత్రమే ఓట్లేశారు. ఈ సారి కామారెడ్డి నియోజకవర్గంలో 2,54,271 మంది, ఎల్లారెడ్డిలో 2,21,790, జుక్కల్లో 2,01,230, బాన్సువాడలో 1,95,394 మంది ఓటర్లున్నారు. వీరంతా ఓటు వేసేలా యంత్రాంగం చర్యలు చేపడుతోంది.