హనుమకొండ, వెలుగు: ప్రభుత్వ ఆసుపత్రుల్లోని వార్డులు, బెడ్లకు వారం రోజుల్లో ప్రత్యేకంగా నెంబర్లు ఏర్పాటు చేయాలని జిల్లా కలెక్టర్ పి.ప్రావీణ్య ఆఫీసర్లకు సూచించారు. జిల్లాలోని ప్రభుత్వ ఆసుపత్రుల అభివృద్ధికి తీసుకోవాల్సిన చర్యలపై హాస్పిటల్ సూపరింటెండెంట్లు, వైద్యారోగ్యశాఖ అధికారులతో కలెక్టరేట్ కాన్ఫరెన్స్ హాలులో రివ్యూ నిర్వహించారు.
ఈ సందర్భంగా కలెక్టర్ మాట్లాడుతూ ఆసుపత్రుల్లో ఉన్న పేషెంట్ పేరు, ఏ వార్డులో ఉన్నారనే వివరాలను బోర్డులపై ప్రదర్శించాలన్నారు. ఆరోగ్యశ్రీ పరిధిలో ఏఏ జబ్బులు ఉన్నాయో, వాటి ఖర్చు వివరాలను బుక్ లెట్స్ తయారు చేయాలని సూచించారు. సూపరింటెండెంట్లకు సమస్యల పరిష్కారంలో సహాయపడేందుకు కోఆర్డినేటర్లను నియమించినట్లు వివరించారు. ఈ సమావేశంలో అడిషనల్ కలెక్టర్ వెంకటరెడ్డి, పరకాల ఆర్డీవో నారాయణ, డీఎంహెచ్వో సాంబశివరావు తదితరులు పాల్గొన్నారు.
