- ఏజెన్సీ ప్రాంతాల్లో ఫారెస్ట్ పర్మిషన్స్ రాక నిలిచిన డెవలప్మెంట్ వర్క్స్
భద్రాద్రికొత్తగూడెం, వెలుగు : కేంద్ర ప్రభుత్వ సంక్షేమ పథకాల అమలును సమీక్షించేందుకు ఏర్పాటు చేసిన దిశ(జిల్లా అభివృద్ధి సమన్వయ, పర్యవేక్షణ కమిటీ) మీటింగ్ జాడ లేకుండా పోయింది. ప్రతి మూడు నెలలకోసారి రివ్యూ చేయాల్సి ఉండగా.. 8 నెలలు అవుతున్నా మీటింగ్ జరగడం లేదు. ప్రధానంగా ఏజెన్సీలో మావోయిస్టు ప్రభావిత ప్రాంతాల అభివృద్ధి కోసం కేంద్రం రూ. కోట్లలో ఫండ్స్ స్తున్నా.. ఫారెస్ట్ పర్మిషన్స్ లేక ఏండ్ల కాలంగా పనులు అసంపూర్తిగా ఉంటున్నాయి. దీంతో ఏజెన్సీ వాసులకు కష్టాలు తప్పడం లేదు.
జాడలేని దిశ రివ్యూ మీటింగ్...
కేంద్ర ప్రభుత్వం అమలు చేస్తున్న దాదాపు 20కిపైగా అభివృద్ధి పథకాలపై ప్రతి మూడు నెలలకోసారి ఆఫీసర్లతో రివ్యూ చేసేందుకు దిశ కమిటీని ప్రభుత్వం ఏర్పాటు చేసింది. ఎంపీలతో పాటు జిల్లాలోని ఎమ్మెల్యేలు సెలెక్ట్ చేసిన జడ్పీటీసీలు, ఎంపీపీలతో పాటు కో ఆప్షన్ మెంబర్లు దిశ కమిటీలో మెంబర్లుగా ఉంటారు. భద్రాద్రికొత్తగూడెం జిల్లా దిశ కమిటీ చైర్మన్గా మహబూబాబాద్ ఎంపీ పోరిక బలరాం చైర్మన్గా వ్యవహరిస్తున్నారు.
గత జనవరి తర్వాత దిశ మీటింగ్ జరగలేదు. ఉపాధి హామీ పథకంలో పెద్ద ఎత్తున అక్రమాలు జరుగుతున్నాయి. సోషల్ ఆడిట్లో అవి వెలుగులోకి వస్తున్నా రికవరీ మాత్రం అంతంత మాత్రంగానే ఉంటుంది. కొత్తగూడెం(భద్రాచలం రోడ్) రైల్వే స్టేషన్ నుంచి పలు రైళ్లు తరుచూ రద్దు అవుతుండడంతో ప్రయాణికులు తీవ్ర ఇబ్బందులు పడ్తున్నారు. యువతులతో పాటు గర్బిణులు, బాలింతలను రక్తహీనత వేధిస్తొంది.
శ్యాంప్రసాద్ ముఖర్జీ రూర్బన్ మిషన్, ప్రధాన మంత్రి ఉపాధి కల్పన స్కీంపై జిల్లా యువతకు పెద్దగా అవగాహన లేకుండా పోయింది. అవగాహన కల్పించడంలో పరిశ్రమల శాఖాధికారులు విఫలమయ్యారనే ఆరోపణలున్నాయి. ప్రధానమంత్రి కిసాన్ సమ్మాన్ నిధి, టెలికం సేవలు, అగ్రికల్చర్, హార్టికల్చర్ డిపార్ట్మెంట్లపై రివ్యూ చేసి, అభివృద్ది , సంక్షేమ కార్యక్రమాలను దిశానిర్దేశం చేయాల్సి ఉంది.
ఏజెన్సీ వాసులు ఇబ్బందులు
మావోయిస్ట్ ప్రభావిత ప్రాంతాల్లో రూ. వందల కోట్లతో జరుగుతున్న అభివృద్ధి పనులపై దిశ కమిటీ సమీక్షించాలి. ఫారెస్ట్ పర్మిషన్స్ రాక పలు పనులు అసంపూర్తిగా ఉన్నాయి. భద్రాచలం, ఇల్లెందు, పాల్వంచ డివిజన్లలో ఏండ్ల కాలంగా పనులు పూర్తి కాకపోవడంతో ఏజెన్సీ వాసులు ఇబ్బందులు పడ్తున్నారు. బ్రిడ్జీలు, రోడ్లు సగంలోనే ఆగిపోయాయి. నేషనల్ హైవేలో భాగంగా జిల్లాలో నిర్మిస్తున్న రోడ్లు, బ్రిడ్జీలు నత్తతో పోటీ పడ్తున్నాయి. ప్రమాదాలు చోటు చేసుకుంటున్నాయి.
డ్రింకింగ్ వాటర్, ఫారెస్ట్, ముద్రా లోన్స్ వంటి పలు స్కీమ్స్పై సమీక్షించాల్సి ఉంది. కొత్తగూడెంలోని మాతా, శిశు సంరక్షణ హాస్పిటల్లో శిశు మరణాలు ఎక్కువ జరుగుతున్నాయి. వైద్య సేవలు సరిగా అందడం లేదని రోగులు వాపోతున్నారు. ఎక్స్రే, స్కానింగ్ కోసం ఆరు కిలోమీటర్ల దూరంలోని గవర్నమెంట్ హాస్పటల్కు వెళ్లాల్సి వస్తోంది. వీటిపై చర్చిద్దామంటే దిశ మీటింగ్ పెట్టడం లేదని సభ్యులు వాపోతున్నారు. ప్రాధాన్యత గల దిశ కమిటీ మీటింగ్ను నిర్వహించేందుకు ఎంపీలతో పాటు జిల్లా ఆఫీసర్లు చొరవ చూపాలి.
