- గౌరు అశోక్రెడ్డి హత్య కేసులో జిల్లా కోర్టు తీర్పు
- 2012లో వరంగల్ జిల్లాలో సంచలనం సృష్టించిన హత్య
హన్మకొండ అర్బన్, వెలుగు: వరంగల్అర్బన్జిల్లా హసన్పర్తి మండలం నాగారానికి చెందిన బీజేపీ నేత గౌరు అశోక్రెడ్డి హత్య కేసులో 16 మందికి యావజ్జీవ కారాగార శిక్షను విధిస్తూ జిల్లా కోర్టు ప్రధాన న్యాయమూర్తి తిరుమలాదేవి తీర్పు చెప్పారు. 2012 నాటి ఈ కేసులో వాద ప్రతివాదనలు పూర్తి అయిన తర్వాత సోమవారం ఐపీసీ 148, 302, 120(బీ), 149, 341 సెక్షన్ల ప్రకారం జడ్జి తీర్పు ప్రకటించారు.
ప్రాణం తీసిన ‘బొడ్రాయి’ గొడవ
గౌరు అశోక్ రెడ్డి దారుణ హత్యకు బొడ్రాయి ప్రతిష్ఠాపన విషయంలో జరిగిన గొడవ కారణమైంది. నాగారంలో 2011 డిసెంబర్‌‌లో బొడ్రాయి ప్రతిష్ఠాపన సమయంలో అశోక్రెడ్డికి, అదే గ్రామానికి చెందిన గౌరు యాదగిరి రెడ్డి, పోరెడ్డి సమ్మిరెడ్డి, బొద్దుకూరి సమ్మయ్య, దామెర యాదగిరి, బండారి సాంబయ్యతో చందాల వసూళ్ల విషయంలో గొడవ జరిగింది. దీంతో వీరంతా అశోక్రెడ్డిపై కోపం పెంచుకున్నారు. ఆ తర్వాత హన్మకొండలో ఉండే అశోక్రెడ్డి 2012 మార్చి 3న గ్రామంలో జరిగిన కనుకుంట్ల గణేష్ పెండ్లికి వచ్చాడు. పెండ్లి ఊరేగింపులో బండారి రాజుతో గొడవ జరిగింది. దీంతో అశోక్రెడ్డిపై కోపగించుకున్న రాజు గౌరు యాదగిరి రెడ్డి, ఇతరులతో కలిసి హత్య చేయాలని నిర్ణయించుకున్నారు. మరునాడు హన్మకొండకు బయలుదేరిన అశోక్రెడ్డిని దారిలో మొక్కజొన్న చేను వద్ద ఆపారు. అశోక్రెడ్డి భార్య మమత, 9 ఏండ్ల కొడుకు,5 ఏండ్ల కూతురి ముందే అతడిని కర్రలు, బ్యాట్లు, ఇనుపకడ్డీలతో తీవ్రంగా కొట్టి పారిపోయారు. అశోక్రెడ్డి ఆస్పత్రిలో చికిత్స పొందుతూ చనిపోయాడు. కాగా, దోషులను వరంగల్ సెంట్రల్జైలుకు తరలించారు. తీర్పు వెలువడగానే దోషుల కుటుంబ సభ్యులు కోర్టు హాల్ వద్దే విలపించారు. కోర్టు తీర్పు నేపథ్యంలో నాగారంలో అవాంఛనీయ సంఘటనలు జరగకుండా పోలీసులు బందోబస్తు ఏర్పాటు చేశారు.
శిక్ష పడింది వీరికే..
కొండెపాక భిక్షపతి అలియాస్రఘు, బండారి రాజు, గౌరు భగవాన్రెడ్డి, సిలువేరు అశోక్, బండారి గణేష్, కుక్కుముడి జయరాజ్, దామెర రాజ్కుమార్, మెరుగు రాజు, రావుల కర్ణాకర్, దున్నపోతుల శ్రీకాంత్, గుంటి రాజేంద్ర ప్రసాద్, గౌరు యాదగిరి రెడ్డి, పోరెడ్డి సమ్మిరెడ్డి, బొడ్డుకూరి సమ్మయ్య, దామెర యాదగిరి, బండారి సాంబయ్య. వీరిలో కొండెపాక భిక్షపతి నాగారం సర్పంచ్ కాగా, గౌరు యాదగిరి రెడ్డి, గౌరు భగవాన్రెడ్డి తండ్రీ కొడుకులు.
