బీఆర్ఎస్ పార్టీ ఎమ్మెల్యే అభ్యర్థుల లిస్టులో బీసీలకు 22 సీట్లు మాత్రమే కేటాయించడంపట్ల బీజేపీ జాతీయ ఉపాధ్యక్షురాలు డీకే అరుణ మండి పడ్డారు. ఆగస్టు 22న హైదరాబాద్లో ఆమె మీడియాతో మాట్లాడుతూ.. బీఆర్ఎస్ ప్రకటించిన ఎమ్మెల్యేల అభ్యర్థులపై అనేక ఆరోపణలు వచ్చినప్పటికీ వారికే తిరిగి టికెట్టు కేటాయించడం ఏంటని ఆమె ప్రశ్నించారు.
సీఎం కేసీఆర్కు తన కుమార్తె కల్వకుంట్ల కవిత తప్పా ఏ మహిళపై విశ్వాసం, గౌరవం లేదని విమర్శించారు. కేంద్రంలోని బీజేపీ ప్రభుత్వం మహిళకు అన్ని రంగాల్లో ప్రాధాన్యత ఇస్తుండగా బీఆర్ఎస్ సర్కార్ వారిని పూర్తిగా విస్మరించిందని.. ఆ విషయం ఎమ్మెల్యే అభ్యర్థుల లిస్ట్ప్రకటనతో తేటతెల్లమైందన్నారు.
ALSO READ : పుట్టినరోజున మనవరాలితో.. వైరలవుతున్న చిరు, క్లింకార ఫొటో
బీసీలు, మహిళలకు సీఎం కేసీఆర్ తీరని అన్యాయం చేశారని.. అధికార పార్టీ, కాంగ్రెస్ల మధ్య లోపాయికారి ఒప్పందం ఉందని ఆమె ఆరోపించారు.
వనితలపై అత్యాచారాలు జరుగుతున్నా ప్రభుత్వం స్పందించట్లేదని ఆవేదన వ్యక్తం చేశారు. మీర్పేటలో జరిగిన ఘటనపై సీఎం కార్యాలయ మహిళాధికారులు సైతం స్పందించకపోవడం సిగ్గు చేటని అన్నారు.
బీఆర్ఎస్ప్రజాప్రతినిధులందరికీ రాజకీయ పిచ్చి పట్టుకుందని పబ్లిక్ సమస్యలు పరిష్కరించడం చేతకావట్లేదని తీవ్ర వ్యాఖ్యలు చేశారు. రాష్ట్రాన్ని కేసీఆర్ అప్పులపాలు చేస్తున్నా, మహిళలపై దాడులు జరుగుతున్నా ప్రశ్నించాల్సిన అధికారులు బీఆర్ఎస్ నేతలకు వంత పడుతుండటం బాధాకరమని అన్నారు.
