హుజూర్ నగర్, వెలుగు : ఎవరైనా ప్రభుత్వ నిబంధనలు అతిక్రమిస్తే చర్యలు తప్పవని డీఎంహెచ్వో డాక్టర్ కోటాచలం హెచ్చరించారు. శనివారం హుజూర్ నగర్ పట్టణంలో ప్రైవేట్ఆస్పత్రులను ఆయన తనిఖీ చేశారు. ఇటీవల పట్టణంలోని లింగగిరి రోడ్ లో ఉన్న న్యూ కమల ఆస్పత్రిలో చివ్వేంల మండలం ఎంజీ తండాకు చెందిన 7 నెలల గర్భిణి సుహాసినికి అబార్షన్ చేయడంతో తీవ్ర రక్తస్రావంతో మృతి చెందిన విషయం తెలిసిందే.
ఈ సందర్భంగా న్యూ కమల ఆస్పత్రిలోని రికార్డులను స్వాధీనం చేసుకున్నారు. అదేవిధంగా అనుమతులు లేకుండా కమల డెంటల్ కేర్ పేరుతో నడుపుతున్న మరో ఆస్పత్రిని సీజ్ చేశారు. అనంతరం డీఎంహెచ్వో మాట్లాడుతూ లింగ నిర్ధారణ పరీక్షలు, అబార్షన్లు చేసే వైద్యులపై చర్యలు తీసుకుంటామన్నారు. ఆయన వెంట డిప్యూటీ డీఎంహెచ్ వో నిరంజన్, జిల్లా మాస్ మీడియా అధికారి అంజయ్యగౌడ్ తదితరులు ఉన్నారు.
