వనపర్తి టౌన్, వెలుగు: జిల్లాలో ప్రతి ఒక్కరూ తమ చిన్నారులకు పోలియో చుక్కలు వేయించి పోలియోను సమూలంగా తరిమేసేందుకు సహకరించాలని డీఎంహెచ్ వో జయ చంద్రమోహన్ కోరారు. ఆదివారం వనపర్తి జిల్లా కేంద్రంలోని ప్రభుత్వ ఆసుపత్రిలో పల్స్ పోలియో కార్యక్రమాన్ని ప్రారంభించారు. జిల్లా వ్యాప్తంగా ఏర్పాటు చేసిన కేంద్రాల్లో పోలియో చుక్కలు వేస్తారని చెప్పారు. సోమ, మంగళవారాల్లో ఇంటింటికీ తిరిగి పోలియో చుక్కలు వేసేందుకు అన్ని ఏర్పాట్లు చేశామని తెలిపారు. డీఐవో పరిమళ, మాస్ మీడియా ఇన్చార్జి చంద్రయ్య, హెల్త్ ఎడ్యుకేటర్ మధు పాల్గొన్నారు.
గద్వాల: జిల్లాలోని ఐదేండ్ల లోపు పిల్లలందరికీ పోలియో చుక్కలు వేయాలని ఇన్చార్జి డీఎంహెచ్ వో శశికళ సూచించారు. జమ్మిచేడ్ లో పల్స్ పోలియోను ప్రారంభించారు. జిల్లాలో 73,870 మంది చిన్నారులను గుర్తించామని, వారందరికీ పోలియో చుక్కలు వేస్తామన్నారు. డాక్టర్ సిద్ధప్ప, స్రవంతి, మధుసూదన్ రెడ్డి, నరేంద్రబాబు, తిరుమలేశ్, వరలక్ష్మి పాల్గొన్నారు.
నాగర్ కర్నూల్: జిల్లాలో పల్స్పోలియో ప్రోగ్రాం సక్సెస్ అయిందని డీఎంహెచ్వో సుధాకర్లాల్ తెలిపారు. జిల్లాలోని 89,439 పిల్లలకు పోలియో చుక్కలు వేయడానికి 613 సెంటర్లు ఏర్పాటు చేసినట్లు తెలిపారు. ఇటుక బట్టీలు, సంచార జాతుల ఆవాసాల్లో పిల్లల కోసం 28 మొబైల్ టీమ్లను ఏర్పాటు చేశామన్నారు.
నారాయణపేట: ఐదేండ్ల లోపు చిన్నారులకు తప్పనిసరిగా పోలియో చుక్కలు వేయించాలని ఐఎంఏ అధ్యక్షుడు మల్లికార్జున్, ట్రెజరర్ గీత పిలుపునిచ్చారు. ఐఎంఏ ఆధ్వర్యంలో డాక్టర్ల బృందం పట్టణంలోని గవర్నమెంట్ గర్ల్స్ హైస్కూల్లో ఏర్పాటు చేసిన సెంటర్లో చిన్నారులకు పోలియో చుక్కలు వేశారు. అనంతరం 125 మంది వ్యాక్సినేటర్లకు భోజనం ప్యాకెట్లను అందించారు. బాలాజీ రావ్ సింగాడే, గందె కార్తీక్, గగన్, అక్షిత, దీపిక, ప్రియాంక పాల్గొన్నారు.
