- జలసౌధలో ఇంజనీరింగ్అధికారుల నిరసన
హైదరాబాద్, వెలుగు: ఇరిగేషన్ డిపార్ట్మెంట్లో ఎక్స్టెన్షన్లు ఇవ్వొద్దని ఇంజనీరింగ్ అధికారులు డిమాండ్ చేశారు. ఎక్స్టెన్షన్లతో అర్హత కలిగిన అధికారులకు అన్యాయం జరుగుతున్నదని వాపోయారు. మంగళవారం జలసౌధలో మధ్యాహ్నం లంచ్ బ్రేక్లో ఏటీఏఈఈ అసోసియేషన్ ఆధ్వర్యంలో ‘ఎక్స్టెన్షన్ వద్దు.. ప్రమోషన్లు ముద్దు’ పేరిట నిరసన చేపట్టారు. వీరికి టీజీవో సెంట్రల్ అసోసియేషన్ మద్దతు తెలిపింది. ఈ సందర్భంగా ఈఎన్సీ అనిల్ కుమార్, ఇరిగేషన్ సెక్రటరీ రాహుల్ బొజ్జాకు వినతిపత్రం ఇచ్చారు. డిపార్ట్మెంట్లో ఒక చీఫ్ ఇంజనీర్కు ఎక్స్టెన్షన్ ఇస్తే ఆరుగురు అధికారుల ప్రమోషన్లను అడ్డుకున్నట్టేనని, డిపార్ట్మెంట్లో ఎక్కువ కాలం పనిచేసిన 200 మంది అధికారులు ప్రమోషన్లు లేక ఇబ్బంది పడుతున్నారని చెప్పారు. ఈ విషయాన్ని మంత్రి ఉత్తమ్ కుమార్ రెడ్డి దృష్టికి తీసుకెళ్తామని సెక్రటరీ రాహుల్ బొజ్జా హామీ ఇచ్చినట్టు సంఘం ప్రతినిధులు తెలిపారు. కార్యక్రమంలో టీజీవో సెంట్రల్ అసోసియేషన్ అధ్యక్షుడు ఏలూరి శ్రీనివాస రావు, జనరల్ సెక్రటరీ సత్యనారాయణ, అసోసియేట్ ప్రెసిడెంట్ శ్యామ్, ఏటీఏఈఈ అధ్యక్షుడు బండి శ్రీనివాస్, జనరల్ సెక్రటరీ నాగరాజు తదితరులు పాల్గొన్నారు.
