- రోగి పక్కటెముకల్లోని ట్యూమర్ ను తొలగించిన డాక్టర్లు
ఆదిలాబాద్టౌన్, వెలుగు: ఆదిలాబాద్ లోని రిమ్స్ సూపర్ స్పెషాలిటీ హాస్పిటల్ డాక్టర్లు అరుదైన శస్ర్తచికిత్స చేసి రోగికి పక్కటెముకల్లోని క్యాన్సర్ ట్యూమర్ను తొలగించారు. ఆస్పత్రి డైరెక్టర్ జైసింగ్ రాథోడ్ గురువారం మీడియా సమావేశం నిర్వహించి వివరాలు వెల్లడించారు. జిల్లాకు చెందిన అభిషేక్ (26) అనే యువకుడు బోన్ క్యాన్సర్తో బాధపడుతుండడంతో.. ఆంకో సర్జన్(క్యాన్సర్ ప్రత్యేక నిపుణుడు) డా.జక్కుల శ్రీకాంత్ నేతృత్వంలో వైద్య బృందం బాలుడి పక్కటెముకల్లోని గుండెకు, ఊపిరితిత్తులకు అతుక్కొని ఉన్న క్యాన్సర్ కణాలను 7 గంటల పాటు శస్ర్త చికిత్స చేసి తొలగించినట్లు చెప్పారు.
ఈ సర్జరీని ప్రైవేట్లో చేయిస్తే రూ.6 లక్షలకు పైగా ఖర్చవుతుందని, రిమ్స్లో ఉచితంగా చేసినట్లు తెలిపారు. ఆస్పత్రిలో అందుబాటులో ఉన్న వైద్య సేవలను ప్రజలు సద్వినియోగం చేసుకోవాలని కోరారు. సమావేశంలో సూపరింటెండెంట్ డా.అశోక్, యూరాలజీ డా.కుమ్మరి కార్తీక్ పటేల్ తదితరులు పాల్గొన్నారు.
