- హైదరాబాద్ తరలించేందుకు ఏర్పాట్లు
- 23న ఉన్మాది దాడితో బ్రెయిన్డెడ్
- చనిపోయిందని భావించే తోఫిక్ నాటకం: సీపీ
నిజామాబాద్, వెలుగు: నిజామాబాద్ జిల్లా జక్రాన్పల్లిలో ఉన్మాది చేతిలో ఈ నెల 23న పాశవిక దాడికి గురైన ఘనపురం తేజశ్రీ బ్రెయిన్డెడ్ అయినట్లు జీజీహెచ్ డాక్టర్లు తేల్చారు. వెంటిలేటర్పై ఉన్న ఆమె కోలుకునే అవకాశాలు లేవని నిర్ధారించిన డాక్టర్లు ఆమె పేరెంట్స్ను అవయవదానానికి ఒప్పించారు. దీంతో తేజశ్రీని హైదరాబాద్ తరలించేందుకు ఏర్పాట్లు చేస్తున్నట్లు నిజామాబాద్ పోలీస్ కమిషనర్సత్యనారాయణ బుధవారం మీడియాకు తెలిపారు. ఘటనకు సంబంధించి తమ ప్రాథమిక దర్యాప్తులో తేలిన విషయాలను వివరించారు.
పట్టించుకోవడం లేదనే దారుణం..
జక్రాన్పల్లి మండల కేంద్రంలోని ఒకే కాలనీలో నివసించే తేజశ్రీ, తోఫిక్ల ఎనిమిదేండ్ల స్నేహం అయిదేండ్ల కింద ప్రేమగా మారింది. ఇద్దరూ పెండ్లి చేసుకోవాలనుకున్నారు. ఇరువైపులా కుటుంబాలకు కూడా ఈ విషయం తెలుసు. తోఫిక్ను అమితంగా ఇష్టపడే తేజశ్రీ అతని పేరును ఇమ్రాన్గా మార్చి అందులోని మొదటి అక్షరం ‘ఐ’ ని తన చేతిపై టాటూగా వేయించుకుంది. కానీ లిక్కర్, ఇతర మత్తు పదార్థాలకు బానిసైన తోఫిక్ ప్రవర్తన నచ్చక కొన్నాళ్ల నుంచి తేజశ్రీ అతడిని దూరం పెడ్తోంది. తాను మాట్లాడడం మానేస్తే దురలవాట్లు మార్చుకుంటాడని తేజశ్రీ భావించింది.
కానీ తోఫిక్లో మార్పు రాకపోగా ఉన్మాదిగా మారాడు. ఘటన జరిగిన రోజు రాత్రి 9 గంటల టైంలో 10 నిమిషాలు మాట్లాడాల్సి ఉందని బయటకు తీసుకెళ్లిన తోఫిక్, తేజశ్రీపై విచక్షణారహితంగా దాడి చేశాడు. తీవ్రంగా కొట్టడంతో కోమాలోకి వెళ్లగా చనిపోయిందని భావించిన తోఫిక్, తేజశ్రీ బైక్పై నుంచి పడిందని డ్రామా ఆడాడు. కాగా, తోఫిక్ ఒక్కడే ఈ దాడి చేశాడా? అతనికి ఇంకా ఎవరైనా సహకరించారా? అన్న విషయం త్వరలోనే తేలుతుందన్నారు. కేసు ఇంకా విచారణ దశలో ఉందని, కానీ ఘటనపై రకరకాల ప్రచారాలు జరుగుతున్నందునే ఇప్పటివరకు జరిగిన ఇన్వెస్టిగేషన్లో తేలిన విషయాలు చెబుతున్నానని కమిషనర్ సత్యనారాయణ తెలిపారు.
