- త్రీడీ గ్రాఫిక్స్తో రూపొందించినం: మంత్రి తలసాని
- 17న కేసీఆర్ పుట్టిన రోజు సందర్భంగా జలవిహార్లో ప్రదర్శిస్తం
- బల్కంపేట ఎల్లమ్మకు రెండున్నర కిలోల బంగారంతో తయారు చేసిన చీర సమర్పిస్తం
- మృత్యుంజయ హోమం చేయిస్తం
- పార్శీ గుట్ట మైసమ్మకు బంగారు కవచం ఇస్తామని వెల్లడి
హైదరాబాద్, వెలుగు: సీఎం కేసీఆర్ జీవిత చరిత్రపై బాహుబలి రేంజ్లో త్రీడీ గ్రాఫిక్స్తో డాక్యుమెంటరీని రూపొందించామని.. కేసీఆర్ పుట్టినరోజు సందర్భంగా ఈ నెల 17న దానిని విడుదల చేస్తామని మంత్రి తలసాని శ్రీనివాస్ యాదవ్ చెప్పారు. హైదరాబాద్లోని జలవిహార్లో నిర్వహించే కేసీఆర్ పుట్టినరోజు వేడుకల్లో దానిని ప్రదర్శిస్తామని తెలిపారు. ఈ డాక్యుమెంటరీ టీజర్ను తలసాని సోమవారం విడుదల చేశారు. కేసీఆర్ బాల్యం, రాజకీయ ప్రస్థానం, తెలంగాణ ఉద్యమం నేపథ్యాన్ని వివరిస్తూ 30 నిమిషాల త్రీడీ డాక్యుమెంటరీని రూపొందించామని చెప్పారు. దీనితోపాటు ప్రత్యేకంగా రూపొందించిన ఐదు పాటలను కూడా జన్మదిన వేడుకల్లో ప్రదర్శిస్తామని తెలిపారు.
హోమాలు, ప్రత్యేక పూజలు
కేసీఆర్ పుట్టినరోజు సందర్భంగా మరెన్నో కార్యక్రమాలు చేపడుతున్నామని తలసాని వివరించారు. దాతల సహకారంతో రెండున్నర కిలోల బంగారంతో తయారు చేయించిన చీరను ఎమ్మెల్సీ కవితతో కలిసి బల్కంపేట అమ్మవారికి సమర్పించనున్నట్టు తెలిపారు. సికింద్రాబాద్లోని ఉజ్జయిని మహంకాళి అమ్మవారి ఆలయంలో మృత్యుంజయ హోమం, ఆయుష్షు హోమం, ప్రత్యేక పూజలు చేయిస్తున్నామన్నారు. పార్సీగుట్టలోని బంగారు మైసమ్మ ఆలయంలో అమ్మవారికి బంగారు కవచం అలంకరించి ప్రత్యేక పూజలు, అభిషేకాలు నిర్వహిస్తామని.. సికింద్రాబాద్ గణేశ్ ఆలయంలో గణపతి కల్యాణం చేయిస్తామని తెలిపారు. మహిళలకు చీరలు పంపిణీ చేస్తామన్నారు. నాంపల్లిలోని యూసెఫిన్ దర్గాలో చాదర్ సమర్పణ, గురుద్వారాలో గురుగ్రంథ్ సాహెబ్ కు ప్రత్యేక పూజలు, మహిళలకు చీరల పంపిణీ, గాంధీ హాస్పిటల్లో పండ్ల పంపిణీ వంటి కార్యక్రమాలు నిర్వహిస్తున్నట్టు చెప్పారు. కోటి వృక్షార్చనలో భాగంగా పెద్ద ఎత్తున మొక్కలు నాటే కార్యక్రమాన్ని కూడా చేపడతామన్నారు. జలవిహార్లో జరిగే కేసీఆర్ జన్మదిన వేడుకల్లో స్పీకర్ పోచారం శ్రీనివాస్ రెడ్డి, డిప్యూటీ స్పీకర్ పద్మారావు గౌడ్, మండలి చైర్మన్ గుత్తా సుఖేందర్ రెడ్డి, డిప్యూటీ చైర్మన్ నేతి విద్యా సాగర్, మంత్రులు మహమూద్ అలీ, మల్లారెడ్డి, పలువురు ఎంపీలు, ఎమ్మెల్సీలు, ఎమ్మెల్యేలు, టీఆర్ఎస్ నేతలు పాల్గొంటారని తెలిపారు.
For More News..
