అమెరికా 47 అధ్యక్షుడిగా డోనాల్డ్ ట్రంప్ ప్రమాణం చేశారు. రెండోసారి అమెరికా అధ్యక్షుడిగా బాధ్యతలు స్వీకరించారు ట్రంప్. క్యాపిటల్ హిల్ లోని రోటుండా ఇండోర్ లో భారీ ఏర్పాట్ల మధ్య అట్టహాసంగా జరిగిన ఈ కార్యక్రమానికి 25వేల మంది భద్రతా సిబ్బందితో కట్టుదిట్టమైన భద్రతా ఏర్పాట్లు చేశారు.
ట్రంప్ ప్రమాణ స్వీకార కార్యక్రమానికి అమెరికా మాజీ అధ్యక్షులు బైడెన్, ఒబామా హాజరయ్యారు. ఈ కార్యక్రమానికి భారత్ తరపున విదేశాంగ మంత్రి జైశంకర్ హాజరయ్యారు. పారిశ్రామిక దిగ్గజాలు ఎలాన్ మస్క్,మార్క్ జుకర్ బర్గ్, ముకేశ్ అంబానీ, సుందర్ పిచాయ్ కూడా ఈ కార్యక్రమానికి హాజరయ్యారు.
2017లో తొలిసారి అమెరికా అధ్యక్షుడిగా బాధ్యతలు చేపట్టిన ట్రంప్..ఇవాళ ( జనవరి 20, 2025 ) రెండోసారి అమెరికా అధ్యక్ష బాధ్యతలు చేపట్టారు. ఈ కార్యక్రమంలో ట్రంప్ తో పాటు జేడీ వాన్స్ అమెరికా ఉపాధ్యక్షుడిగా ప్రమాణం చేశారు.
