న్యూఢిల్లీ: ప్రస్తుత ఆర్థిక సంవత్సరం సెప్టెంబర్ 30తో ముగిసిన రెండో క్వార్టర్లో డాక్టర్ రెడ్డీస్ లాబొరేటరీస్ లాభం వార్షికంగా 33.02 శాతం వృద్ధితో రూ. 1,482.2 కోట్లకు చేరుకుంది. యూఎస్ జనరిక్స్ మార్కెట్ నుంచి భారీ రెవెన్యూ కారణంగా లాభం పెరిగింది. ఏడాది క్రితం ఇదే క్వార్టర్లో కంపెనీ రూ. 1,114.2 కోట్ల లాభాన్ని నమోదు చేసిందని డాక్టర్ రెడ్డీస్ లాబొరేటరీస్ లిమిటెడ్ (డీఆర్ఎల్) రెగ్యులేటరీ ఫైలింగ్‌‌‌‌లో తెలిపింది. కార్యకలాపాల ద్వారా వచ్చిన ఆదాయం రూ. 6,902.6 కోట్లుగా ఉంది. ఇది వార్షికంగా 9 శాతం పెరిగింది. గత క్యూ2లో ఇది రూ. 6,331.8 కోట్లుగా ఉంది. సెప్టెంబర్ క్వార్టర్లో డీఆర్ఎల్ మొత్తం ఖర్చులు 11.14 శాతం పెరిగి రూ.5,305.1 కోట్లకు చేరాయి. సెప్టెంబర్ క్వార్టర్లో డీఆర్ఎల్ మొత్తం ఆదాయం 13.25 శాతం పెరిగి రూ.7,217.6 కోట్లుగా ఉంది. తాజా క్వార్టర్లో డీఆర్ఎల్ గ్లోబల్ జెనరిక్స్ రూ. 6,113 కోట్లు సంపాదించింది. ఇది ఉత్తర అమెరికా, వర్ధమాన మార్కెట్లు, యూరప్‌‌‌‌ల కారణంగా గత సంవత్సరంతో పోలిస్తే 9.14 శాతం పెరిగింది. ఉత్తర అమెరికా ఆదాయం 13 శాతం వృద్ధితో రూ.3,170 కోట్లకు చేరుకుంది.
