- సోషల్ మీడియాలో షేర్ చేసిన బాధితుడు
- దవాఖానకు తరలించిన కుటుంబసభ్యులు
సూర్యాపేట, వెలుగు : రెండేండ్ల క్రితం భూమి అమ్మితే చెల్లని చెక్కులు ఇచ్చి మోసం చేశాడన్న ఆవేదనతో ఓ యువకుడు పురుగుల మందు తాగి ఆత్మహత్యాయత్నానికి పాల్పడ్డాడు. సూసైడ్ కు ముందు సెల్ఫీ వీడియో తీసుకోగా, గురువారం ఆ వీడియో సోషల్ మీడియాలో వైరల్ గా మారింది. సూర్యాపేట జిల్లా ఆత్మకూరు(యస్) మండలం కోటినాయక్ తండాకు చెందిన ధరావత్ శ్రీకాంత్ రెండేండ్ల కింద 25 గుంటల భూమిని ధరావత్ రాజేశ్కు రూ. కోటికి అమ్మాడు. ఇందులో భాగంగా మొదటి విడతగా రాజేశ్రూ.60 లక్షలు చెల్లించాడు. మిగతా రూ.40 లక్షలు చెక్ లు ఇవ్వగా అవి బౌన్స్ అయ్యాయి.
దీంతో రాజేశ్ను డబ్బులు అడుగుతుండడంతో ఇవ్వకుండా తప్పించుకు తిరుగుతున్నాడు. ఈ విషయమై ఎస్పీకి ఫిర్యాదు చేసినా పరిష్కారం కాకపోవడంతో బుధవారం సాయంత్రం కోటినాయక్తండాలోని అమ్మిన భూమిలో సెల్ఫీ వీడియో తీసుకొని ఆత్మహత్యాయత్నం చేశాడు. తర్వాత సోషల్మీడియాలో షేర్ చేశాడు. ఇది చూసిన కుటుంబసభ్యులు అతడి దగ్గరకు వెళ్లగా అపస్మారక స్థితిలో పడి ఉన్నాడు. వెంటనే ఓ ప్రైవేట్ హాస్పిటల్ కు తరలించారు. ప్రస్తుతం చికిత్స చేస్తున్నామని, ప్రాణాపాయం ఏమీ లేదని డాక్టర్లు చెప్పారు.
