కోల్‌కతా: బెంగాలీ ప్రముఖ దర్శకుడు సిద్ధాంత దాస్ అలియాస్ విక్టో మద్యం మత్తులో బీభత్సం సృష్టించాడు. పీకల్లోతూ మద్యం సేవించి కార్ రాష్ డ్రైవింగ్ చేసి జనాలను ఢీకొట్టాడు. ఈ ఘటనలో ఓ వ్యక్తి మృతి చెందగా.. మరో ఎనిమిది మంది తీవ్రంగా గాయపడ్డారు. ఈ ఘటనపై కేసు నమోదు చేసుకున్న పోలీసులు డైరెక్టర్ సిద్ధాంత దాస్ను అరెస్ట్ చేశారు. పోలీసుల వివరాల ప్రకారం.. దక్షిణ కోల్‌కతాలోని ఠాకూర్‌పుకూర్ ప్రాంతంలో ఆదివారం (ఏప్రిల్ 6) ఉదయం మార్కెట్‌లోని జనసముహాంపైకి ఓ కార్ వేగంగా దూసుకెళ్లింది.
కారు బీభత్సానికి ఓ వ్యక్తి మృతి చెందగా.. 8 మంది గాయపడ్డారు. స్థానికుల ద్వారా సమాచారం అందుకుని హుటాహుటిన ఘటన స్థలానికి చేరుకున్నట్లు తెలిపారు. మద్యం మత్తులో నిర్లక్ష్యంగా కారు నడిపిన వ్యక్తిని డైరెక్టర్ సిద్ధాంత దాస్గా గుర్తించామని వెల్లడించారు. ఆయనతో పాటు కారులో ఎగ్జిక్యూటివ్ ప్రొడ్యూసర్ శ్రియ బసు కూడా ఉన్నారని తెలిపారు. ఇద్దరు మద్యం సేవించి ఉన్నారని చెప్పారు. వీరిద్దరూ ఆదివారం ఓ పబ్కి వెళ్లి రాత్రంతా మద్య సేవించినట్లు గుర్తించామన్నారు. మద్యం మత్తులో నిర్లక్ష్యంగా కారు నడిపి ఓ వ్యక్తి ప్రాణాలు పోవడానికి కారణమైన డైరెక్టర్ సిద్ధాంత దాస్పై వివిధ సెక్షన్ల కింద కేసు నమోదు చేసినట్లు పోలీసులు తెలిపారు.
►ALSO READ | అప్పు ఇచ్చిన పాపానికి ప్రాణం తీశాడు..వడ్డీ వ్యాపారిని చంపి సంపులో పడేశాడు..
ఈ ఘటనపై కోల్‌కతా పోలీసు అధికారి ఒకరు మాట్లాడుతూ.. ఠాకూర్‌పుకూర్ పోలీస్ స్టేషన్ పరిధిలోని డైమండ్ హార్బర్ రోడ్డులోని ఠాకూర్‌పుకూర్ బజార్ సమీపంలో ఉదయం 9:30 గంటల ప్రాంతంలో కారు అనేక మంది పాదచారులను ఢీకొట్టిందని తెలిపారు. దీంతో ఆరుగురు తీవ్రంగా గాయపడగా.. ఒకరు మృతి చెందరాన్నారు. క్షతగాత్రులను చికిత్స నిమిత్తం ఆసుపత్రికి తరలించామన్నారు. ప్రమాదానికి కారణమైన కారును స్వాధీనం చేసుకున్నామని.. కేసు దర్యాప్తు జరుగుతోందని వెల్లడించారు.
