![బాల రాముడిపై దుబ్బాక చేనేత వస్త్రం](https://static.v6velugu.com/uploads/2024/05/dubbaka-handloom-cloth-on-child-rama_ZOjJdiRpeD.jpg)
దుబ్బాక, వెలుగు : అయోధ్య బాల రాముడి కోసం దుబ్బాకలో తయారు చేసిన వస్ర్తం మరోసారి దేశవ్యాప్తంగా గుర్తింపు పొందింది. దుబ్బాక హ్యాండ్లూమ్ కంపెనీలోని లెనిన్ఇక్కత్(చేనేత) పింక్ కలర్వస్ర్తానికి మంచి పేరుంది. దీంతో అయోధ్యలోని బాల రాముడి అలంకరణ కోసం ఢిల్లీకి చెందిన ప్రముఖ డిజైనర్ మనీశ్ త్రిపాఠి దుబ్బాక కంపెనీలోని లెనిన్ఇక్కత్వస్ర్తాన్ని ఎంపిక చేశారు. ఈ విషయాన్ని కంపెనీ ఎండీ బోడ శ్రీనివాస్ తెలిపారు.
ఇప్పటికే రెండు కలర్లతో వస్ర్తాలను అందజేశామని..ఇందులో ప్రతి ఆదివారం బాల రాముడికి అలంకరించేందుకు పింక్ కలర్ వస్ర్తాన్ని సెలెక్ట్ చేశారని చెప్పారు. అంతేగాకుండా ప్రతి సోమవారం నుంచి ఆదివారం వరకు రాముడిని అలంకరించే లెనిన్, ఇక్కత్ వస్ర్తాలను దుబ్బాకలోనే తయారు చేస్తున్నట్లు చెప్పారు. బాల రాముడికి దుబ్బాక చేనేత వస్ర్తాలు అందించడం తమకెంతో ఆనందాన్నిస్తోందన్నారు.
కేంద్ర చేనేత, జౌళీ మంత్రిత్వ శాఖ ఆధ్వర్యంలో గత ఫిబ్రవరిలో ఢిల్లీలో నిర్వహించిన చేనేత చీరల ప్రదర్శనలో కూడా దుబ్బాకలో తయారైన లెనిన్ చీరకు, చేనేత కార్మికులకు మంచి గుర్తింపు వచ్చిందన్నారు.