- యాసంగికి రైతులు ఆరుతడి పంటలే వేసుకోవాలి: ఈఎన్సీ శంకర్‌
కరీంనగర్, వెలుగు: కాళేశ్వరం ప్రాజెక్టులోని మేడిగడ్డ పిల్లర్‌ కుంగిన కారణంగా, ప్రాజెక్టు నీటిని వాడుకునే పరిస్థితి లేదని, చివరి ఆయకట్టు రైతులు ఆరుతడి పంటలే వేసుకోవాలని ఎస్సారెస్పీ ఈఎన్సీ శంకర్‌ తెలిపారు.
కరీంనగర్ ఎల్‌‌‌‌ఎండీ కాలనీలోని గెస్ట్‌‌‌‌హౌస్‌‌‌‌లో నీటి విడుదలపై శనివారం ఈఎన్సీ సమీక్ష సమావేశం నిర్వహించారు. అనంతరం ఆయన మీడియాతో మాట్లాడుతూ.. ఎస్సారెస్పీ చివరి ఆయకట్టు రైతులు ఈ యాసంగిలో ఆరు తడి పంటలే వేసుకోవాలని సూచించారు.
యాసంగి పంటలకు జనవరి1 నుంచి నీటిని విడుదల చేయాలని నిర్ణయించినట్లు తెలిపారు. వారబందీ పద్ధతిన మార్చి31 వరకు మిడ్‌‌‌‌మానేరు, లోయర్ మానేరు రిజర్వాయర్ల నుంచి పంటలకు నీరు ఇస్తామని చెప్పారు. ఈ రెండు రిజర్వాయర్లలో కలిపి యాసంగి పంటలకు 27.541 టీఎంసీల నీరు అందుబాటులో ఉందని వెల్లడించారు. ఈసారికి హుజూరాబాద్‌ వరకు సాగు చేసే పంటలకే నీరందుతుందని పేర్కొన్నారు.
తాగునీటికి ప్రాధాన్యం..
ఈ సారి సాగునీటి కంటే.. తాగునీటికి అధిక ప్రాధాన్యమిస్తున్నట్లు శంకర్‌ తెలిపారు. అందుకే పూర్తి ఆయకట్టుకు నీరివ్వడం కుదరడం లేదన్నారు. నీటిపారుదల శాఖ మంత్రి ఉత్తమ్‌‌‌‌కుమార్‌ రెడ్డి సూర్యాపేట వరకు నీరివ్వాలని సూచించారని తెలిపారు. అయినా నీటి లభ్యత లేని కారణంగా ఇవ్వలేకపోతున్నామన్నారు.
