- 2016లో జరిగిన ఘటనలో ప్రాథమికంగా తేల్చిన విజిలెన్స్
- బీఆర్ఎస్ హయాంలో ఏజెన్సీని మార్చి అంచనాలను దాదాపు3 రెట్లు పెంచినట్టు గుర్తింపు
- ఏడేండ్లపాటు ఎంక్వైరీనితొక్కి పెట్టిన గత సర్కారు
- కాంగ్రెస్ పవర్లోకి రాగానే పాత ఫైళ్ల దుమ్ము దులిపిన విజిలెన్స్ ఆఫీసర్లు
- ఇరిగేషన్ శాఖ నుంచి పలు కీలక ఫైళ్ల స్వాధీనం.. వివరాలపై ఆరా
హైదరాబాద్, వెలుగు: 2016లో మిడ్మానేరు ప్రాజెక్టు కొట్టుకుపోయేందుకు గల కారణాలను విజిలెన్స్ ఆఫీసర్స్ ప్రాథమికంగా గుర్తించారు. డ్యామ్ నిర్మాణ సమయంలో ఎర్త్బండ్ కన్నా స్పిల్వే ఎత్తు పెరగడం, దీని వల్ల భారీ వరద వస్తే ఆనకట్ట కొట్టుకుపోతుందని తెలిసినా అధికారులు, కాంట్రాక్ట్ సంస్థ ప్రతినిధులు పట్టించుకోలేదని తేల్చినట్టు సమాచారం. మిడ్ మానేరు డ్యామ్కొట్టుకుపోయిన ఘటనపై తాజాగా విచారణ చేస్తున్న విజిలెన్స్ డిపార్ట్మెంట్ ప్రాథమికంగా ఆయా అంశాలను గుర్తించినట్టు తెలిసింది. ప్రాజెక్టు కొట్టుకుపోవడానికి కొద్ది రోజుల ముందు నుంచే వరదలు వస్తున్నా, స్పిల్ వే ఎత్తును ఎక్కువగా నిర్మించడం, మధ్యలో కాంట్రాక్టర్ను మార్చడం, అంచనాలను పెంచేసి ఇవ్వడం లాంటి విషయాలు విజిలెన్స్ విచారణలో తేలినట్టు సమాచారం.
ఏడేండ్ల పాటు ఈ ఎంక్వైరీని బీఆర్ఎస్ సర్కారు తొక్కిపెట్టగా, కాంగ్రెస్ అధికారంలోకి రావడంతో విజిలెన్స్ విచారణ స్పీడ్ అందుకున్నది. ఈ క్రమంలో ఇటీవల విజిలెన్స్ అధికారులు జలసౌధకు వచ్చి, పలు కీలక ఫైళ్లన్నింటినీ తీసుకెళ్లినట్టు అధికారవర్గాల ద్వారా తెలుస్తున్నది. అలాగే, కాళేశ్వరం ప్రాజెక్టులో భాగంగా ప్యాకేజీ– 9లో చేపట్టిన ఈ మిడ్మానేరు ప్రాజెక్టుకు సంబంధించి పది రకాల డాక్యుమెంట్లను ఇవ్వాలని ఇరిగేషన్ అధికారులను విజిలెన్స్ డిపార్ట్మెంట్ అడిగినట్టు తెలిసింది. దానికి సంబంధించి విజిలెన్స్ డిపార్ట్మెంట్ నెలన్నర కింద ఇరిగేషన్ అధికారులకు ఓ మెమో కూడా జారీ చేసినట్టు సమాచారం.
స్పిల్ వే ఎత్తు ఎక్కు ఉండడం వల్లే..
మామూలుగా డ్యాముల్లో ఎర్త్ బండ్/ఎర్త్ డ్యామ్లతో పోలిస్తే స్పిల్ వే ఎత్తు తక్కువగా ఉంటుంది. అప్పుడే గేట్లు ఎత్తినప్పుడు వరద ఎలాంటి ఆటంకాల్లేకుండా దిగువకు వెళ్లిపోతుంది. అయితే, మిడ్ మానేరు నిర్మాణ సమయంలో కాంట్రాక్ట్ సంస్థ ఎర్త్ బండ్తో పోలిస్తే స్పిల్ వేని ఎక్కువ ఎత్తులో నిర్మించినట్టు విజిలెన్స్ ఎంక్వైరీలో ప్రాథమికంగా తేల్చినట్టు సమాచారం. వరదలు మొదలయ్యాక అధికారులు పలుమార్లు మిడ్మానేరు పనులను పరిశీలించారని, ఎగువన అప్పర్ మానేరు నుంచి నిరంతరాయంగా వరదలు వస్తున్నా మిడ్మానేరు వద్ద కనీస చర్యలను సూచించిన దాఖలాలు లేవని తేల్చినట్టు తెలిసింది. స్పిల్వే ఎత్తు ఎక్కువగా ఉండడం వల్ల ఎడమ ఎర్త్ బండ్ కొట్టుకుపోయిందని, ఫలితంగానే అప్పటికే జరిగిన రూ.30 కోట్ల పనులకు నష్టం జరిగినట్టు తేల్చిందని సమాచారం. వాస్తవానికి స్పిల్ వే సామర్థ్యాన్ని 5.08 లక్షల క్యూసెక్కుల వరద అంచనాతో నిర్మించినా.. కొట్టుకుపోయిన రోజు వచ్చిన వరద కేవలం లక్ష క్యూసెక్కులే కావడం గమనార్హం.
ఆ రికార్డులు ఇవ్వండి..
మిడ్ మానేరు డ్యామ్ నిర్మాణ విషయంలోనూ పలు అంశాలు బయటపడుతుండడంతో విజిలెన్స్ డిపార్ట్మెంట్ దానిపై సీరియస్గా దృష్టి పెట్టినట్టు తెలిసింది. ఈ క్రమంలోనే ఇటీవల జలసౌధలో ఉన్నతాధికారులతో సమావేశమైన విజిలెన్స్ అధికారులు డ్యామ్కు సంబంధించిన ఫైళ్లను తీసుకెళ్లారని సమాచారం. దాంతో పాటు వాళ్లకు కావాల్సిన 10 అంశాలను లిస్ట్ చేసి ఇచ్చారని తెలిసింది.
పూర్తి సమాచారంతో టెక్నికల్ శాంక్షన్ ఎస్టిమేట్, కాంట్రాక్ట్ సంస్థలతో చేసుకున్న ఒరిజినల్ అగ్రిమెంట్, ఒరిజినల్ ఆఫీస్ కరస్పాండెన్స్ ఫైల్తో పాటు నోట్ఫైల్స్, పనుల అంచనాలు/వర్క్ స్లిప్స్, ప్రతిపాదనల్లో మార్పులు, అనుమతులు, ఒరిజినల్ అగ్రిమెంట్కు అనుబంధంగా చేసుకున్న ఒప్పందాల వివరాలు, అంచనాలు/ధరల పెంపునకు సంబంధించిన రికార్డులు, ప్రాజెక్టు నిర్మాణం మొదలైనప్పటి నుంచి ఇప్పటివరకు ఉన్నతాధికారుల ఇన్స్పెక్షన్ రిపోర్ట్స్, ఫిర్యాదులు వాటిపై తీసుకున్న చర్యలు, వాటికి సంబంధించి ఏవైనా అనుబంధ రికార్డులు, ప్రాజెక్టులో భాగమైన ఏఈఈ, డీఈఈ, ఈఈ, ఎస్ఈ, సీఈ/ఈఎన్సీల వివరాలను పూర్తిగా అందజేయాలని పేర్కొంటూ ఇరిగేషన్ డిపార్ట్మెంట్కు లేఖ రాసినట్టు తెలిసింది.
లెఫ్ట్ సైడ్ బండ్ అంచనాల పెంపు..
కాంట్రాక్ట్ సంస్థ నిర్లక్ష్యం కారణంగా ఎర్త్ బండ్కు 130 మీటర్ల మేర గండి పడి నష్టం జరగడంతో ఆ పనులను చేపడుతున్న ఐవీఆర్సీఎల్ అనే కంపెనీని అధికారులు పక్కనపెట్టేశారు. అయితే, అప్పటికే ఆ పనులను రూ.122.30 కోట్ల అంచనా వ్యయంతో ప్రారంభించారు. సంస్థను పక్కనపెట్టాక అంచనా వ్యయాన్ని రూ.347 కోట్లకు ఒకేసారి పెంచేశారని ప్రాథమికంగా గుర్తించినట్టు తెలిసింది.
అప్పటికే రైట్ ఎర్త్ బండ్ పనులు స్లోగా జరుగుతున్నాయన్న కారణంతో ఆ పనులను చేస్తున్న పుణెకు చెందిన యశోదీప్ ఇన్ఫ్రాస్ట్రక్చర్ అనే సంస్థ కాంట్రాక్ట్ను రద్దు చేసి పాత ధరల ప్రకారమే రాజరాజేశ్వరి కన్స్ట్రక్షన్స్ అనే సంస్థకు అప్పగించారు. కానీ, రైట్ ఎర్త్ బండ్ విషయంలో మాత్రం అంచనా వ్యయాన్ని ఒకేసారి దాదాపు 3 రెట్ల వరకు పెంచారని తేల్చారు. అసలు డ్యామ్నిర్మాణ సమయంలో కన్స్ట్రక్షన్ ప్రొటోకాల్ను పాటించలేదని ప్రాథమికంగా గుర్తించినట్టు తెలిసింది.
