సిలబస్లో మార్పులు చేర్పులకు సంబంధించి ఢిల్లీ యూనివర్సిటీ (డీయూ) ఏడాదికొక వివాదంలో చిక్కుకుంటోంది. తెలంగాణ ప్రొఫెసర్ కంచె ఐలయ్య రాసిన రెండు బుక్స్ని సిలబస్ నుంచి తొలగించి గతేడాది వార్తల్లో నిలిచిన డీయూ.. ఈసారి గుజరాత్ అల్లర్లను సిలబస్లో చేర్చి మరో కొత్త గొడవకు తెర తీసింది.
గుజరాత్లో గోద్రా రైలు దహనమే ఆ తర్వాత జరిగిన అల్లర్లకు కారణమనే వాదన ఉంది. ఈ గొడవల్లో వందల సంఖ్యలో జనం చనిపోయారని అంచనా. ఈ విషయాలను ఇన్డైరెక్ట్గా గుర్తుచేసేలా డిగ్రీ ఇంగ్లిష్ ఆనర్స్ బుక్లో ఓ కథని ఢిల్లీ యూనివర్సిటీ ఈమధ్య చేర్చింది. ఆ రివైజ్డ్ కరికులమ్ డ్రాఫ్ట్ని వర్సిటీ స్టాండింగ్ కమిటీ వారం కిందట అప్రూవ్ చేసింది. ఈ నిర్ణయం వివాదానికి దారి తీసింది. హిస్టరీ బుక్లోని సూఫీ సాధువు అమిర్ ఖుస్రోకి సంబంధించిన పాఠాలను ఎత్తేయటంపైనా నిరసనలు వ్యక్తమవుతున్నాయి.
గుజరాత్ అల్లర్లపై శిల్పా పరాల్కర్ అనే ఆథర్ రాసిన ఆ కల్పిత కథ పేరు ‘మణీబెన్ అలియాస్ బీబీజాన్’. ఈ ఫిక్షన్ స్టోరీలో మనూ అనే వ్యక్తిది లీడ్ రోల్. ‘గుజరాత్ యువక్ భజరంగ్దళ్’ సెక్రెటరీగా పనిచేసే ఆయన ఆరెస్సెస్ నడిపే ఒక స్కూల్లో ఫిజిక్స్ సబ్జెక్ట్ చెబుతుంటాడు. మనూ ఇంటికి ఓ రోజు ఒక ముస్లిం వచ్చి తన కుటుంబానికి జరిగిన అన్యాయం గురించి అతని తల్లికి వివరిస్తూ విలపిస్తాడు.
ఆ రోజు ఏం జరిగిందంటే..
‘వాళ్లు ఎవరినైతే చంపాలనుకున్నారో ఆ పేర్లు ఉన్న లిస్టులతోపాటు కిరోసిన్ డబ్బాలను పట్టుకొని నా ఇంటికి వచ్చారు. నాకు విషయం అర్థమైంది. దీంతో నన్నేమీ చేయొద్దని వాళ్ల కాళ్లా వేళ్లా పడి వేడుకున్నా. అయినా ఆ కిరాతకులు కనికరించలేదు. నా టీవీ షాప్ను నిలువునా దోచుకున్నారు. అక్కడ ఉన్న సామగ్రిని ఇష్టమొచ్చినట్లు ధ్వంసం చేశారు. నా భార్య నఫీసాను, నన్ను వెనక గదిలో బంధించి, మా ఇంటి మీద కిరోసిన్ పోసి నిప్పంటించారు’ అని చెప్పి ఆ ముస్లిం కళ్ల నీళ్లు పెట్టుకుంటాడు. ఇదీ ఆ స్టోరీ. ఈ కథను ఈ ఏడాది నుంచి 78కిపైగా యూజీ ప్రోగ్రామ్స్ సిలబస్లో చేర్చనున్నారు. ఈ డ్రాఫ్ట్కి ఈ నెల 20న యూనివర్సిటీ ఎగ్జిక్యూటివ్ కౌన్సిల్ గ్రీన్ సిగ్నల్ ఇవ్వాల్సి ఉంది. ఆ కౌన్సిల్ నిర్ణయమే ఫైనల్. ఆ మీటింగ్లో దీనికి ఓకే చెప్పకపోతే అక్కడితో ఆగిపోతుంది. ఈ నెల 21 నుంచి డిగ్రీ క్లాసులు ప్రారంభం కానున్నాయి. దీనికి ఒక్క రోజు ముందుగా సిలబస్పై తుది నిర్ణయం వెలువడనుంది.
తప్పుగా చిత్రీకరించారు
డిగ్రీ ఇంగ్లిష్ ఆనర్స్ సిలబస్లో ఈ ఫిక్షన్ స్టోరీని పెట్టడంపై స్టాండింగ్ కమిటీ మెంబర్ రసల్ సింగ్ అభ్యంతరం తెలిపారు. ఆరెస్సెస్ ఆధ్వర్యంలో నడిచే శిశు గృహ విద్యాలయను ఈ కథలో తప్పుగా చిత్రీకరించారు. అక్కడ పాఠాలు చెప్పేవాళ్లను గుజరాత్ అల్లర్లకు పాల్పడ్డ హంతకులుగా చూపారు. స్టోరీ కంటెంట్ని పున: పరిశీలన చేయాల్సి ఉందని స్టాండింగ్ కమిటీలోని మరో సభ్యుడు రాజేశ్ ఝా చెప్పారు. యూనివర్సిటీ సిలబస్ రివిజన్ వ్యవహారం ఇటీవలి కాలంలో అభ్యంతరకరమైన విధంగా సాగుతోందని ఆయన విమర్శించారు. దీనివల్ల తుది నిర్ణయం తీసుకోవాల్సిన సమయంలో సిద్ధాంతపరమైన విభేదాలు తలెత్తుతున్నాయని అసహనం వ్యక్తం చేశారు.
గోద్రా ఘటన
2002 ఫిబ్రవరి 27న గుజరాత్లోని గోద్రా రైల్వే స్టేషన్ వద్ద సబర్మతి ఎక్స్‌‌ప్రెస్‌ రైలు తగలబడింది. ఈ ఘటనలో పదుల సంఖ్యలో ప్రజలు కాలిబూడిదయ్యారు. ఈ మృతుల్లో ఎక్కువ మంది అయోధ్యలోని బాబ్రీ మసీదు స్థలం వద్ద కరసేవకు వెళ్లి తిరిగి వస్తున్న హిందూ యాత్రికులే. దీనికి సంబంధించి 31 మంది ముస్లింలను నేరస్థులుగా కోర్టు తేల్చింది. అయితే, మంటలకు అసలు కారణం ఏంటనేది ఇంకా తేల్లేదు. ఈ ఇన్సిడెంటే తదనంతరం జరిగిన గుజరాత్ అల్లర్లకు కారణమని చెబుతుంటారు.
