- రెవెన్యూలోని కీలక విభాగాల్లో వారిదే హవా
- అవినీతి ఆరోపణలు వస్తున్నా కదలని ఆఫీసర్లు
మంచిర్యాల, వెలుగు : మంచిర్యాల జిల్లా కలెక్టరేట్లోని పలు కీలక విభాగాల్లో పనిచేస్తున్న కొందరు అధికారులు ఏండ్లుగా అక్కడే పాతుకుపోయారు. గత నాలుగేండ్లలో చాలామంది ఆఫీసర్లకు ట్రాన్స్ఫర్లు జరిగినప్పటికీ కొందరు మాత్రం దర్జాగా అవే స్థానాల్లో కొనసాగుతున్నారు. పలువురు అధికారులపై అవినీతి ఆరోపణలు వస్తున్నప్పటికీ ఉన్నతాధికారులు పట్టించుకోవడం లేదు. ఏండ్లుగా ఒకే పోస్టులో తిష్టవేయడం వల్ల వారి కింద పనిచేసే ఉద్యోగులు ఇబ్బందులకు గురవుతున్నారు. ముఖ్యంగా రెవెన్యూ డిపార్ట్మెంట్లో దీర్ఘకాలంగా విధులు నిర్వహిస్తున్న అధికారుల తీరుపై విమర్శలు వెల్లువెత్తుతున్నాయి.
ఇక్కడ అక్రమాలు.. హైదరాబాద్లో ఆస్తులు
కలెక్టరేట్లోని సీ సెక్షన్ ద్వారా భూసేకరణ, నష్టపరిహారం చెల్లింపులు జరుగుతాయి. ఈ సెక్షన్లో దీర్ఘకాలంగా పనిచేస్తున్న ఓ అధికారిపై అనేక ఆరోపణలు వస్తున్నాయి. సింగరేణి ఓపెన్ కాస్ట్ ప్రాజెక్టులు, నేషనల్ హైవేలు, సాగునీటి ప్రాజెక్టులకు భూసేకరణ, నష్టపరిహారం చెల్లింపుల్లో అవకతవకలకు పాల్పడుతున్నట్లు విమర్శలున్నాయి. అడ్డదారిలో సంపాదించిన సొమ్ముతో హైదరాబాద్లో ఆస్తులు కూడబెట్టినట్లు సమాచారం. అవినీతి విషయమై గతంలో పనిచేసిన కలెక్టర్ ఆయనను హెచ్చరించినట్టు సమాచారం. అయినా ఆయన తీరు మారలేదు. ఇటీవల కలెక్టరేట్లోని సీనియర్ అధికారులు ట్రాన్స్ఫర్ కావడంతో ఇప్పుడు సదరు అధికారిదే హవా నడుస్తున్నట్లు తెలుస్తోంది.
ఎవరైనా అధికారులు కలెక్టర్ను కలవాలంటే పర్మిషన్ తీసుకొని వెళ్లాలి. కానీ ఆయన మాత్రం ఎప్పుడంటే అప్పుడు నేరుగా కలెక్టర్ చాంబర్లోకి వెళ్లేంత ‘పరపతి’ సంపాదించుకోవడం విశేషం. వివిధ డిపార్ట్మెంట్లలో పలువురు ఉద్యోగులు సైతం కొంత మంది అధికారుల అండతో నాలుగైదు సంవత్సరాలుగా కుర్చీలను పట్టుకొని వేలాడుతున్నారు. ఇలాంటి ‘లాంగ్ స్టాండింగ్’ అధికారులు, ఉద్యోగులపై ఉన్నతాధికారులు దృష్టి సారించాల్సిన అవసరముంది.
సీ, డీ సెక్షన్లలో ఏండ్లుగా..
అసెంబ్లీ ఎన్నికల నేపథ్యంలో గత నెలలో జిల్లా వ్యాప్తంగా 18 మంది తహసీల్దార్లను ట్రాన్స్ ఫర్ చేశారు. ఏ, బీ సెక్షన్లలో బాధ్యతలు నిర్వహిస్తున్న అధికారులను సైతం బదిలీ చేశారు. కానీ వారికంటే ముందు నుంచి సీ, డీ సెక్షన్లలో కీలక స్థానాల్లో కొనసాగుతున్న అధికారులను మాత్రం కదిలించలేదు. భూసంబంధ వ్యవహారాలన్నీ డీ సెక్షన్ ద్వారా సాగుతుండడంతో అవినీతికి ఆస్కారం ఉంది. ఇదే అదునుగా సదరు అధికారి చేతివాటం చూపుతున్నారనే ఆరోపణలు బలంగా వినిపిస్తున్నాయి.
గతంలో కరీంనగర్ జిల్లా జమ్మికుంటలో పనిచేస్తున్నప్పుడు సదరు అధికారి ఏసీబీకి పట్టుబడ్డాడని, ఆయినా తీరు మారలేదని డిపార్ట్మెంట్లో గుసగుసలాడుకుంటున్నారు. కలెక్టరేట్లో పనిచేసే పలువురు అధికారులు, సిబ్బంది విషయాలు ఉన్నతాధికారులకు చేరవేస్తూ వారికి దగ్గరైనట్లు చర్చించుకుంటున్నారు. దీంతో సదరు ఆఫీసర్ బదిలీ కాకుండా అక్కడే పాతుకుపోయాడు.
