- ఛత్తీస్గఢ్ నారాయణ్పూర్ జిల్లాలో బారెల్ గ్రానైడ్ లాంఛర్లతో అటాక్
- జవాన్లు ఎదురుదాడికి దిగడంతో పారిపోయిన నక్సల్స్
భద్రాచలం, వెలుగు : ఛత్తీస్గఢ్ రాష్ట్రంలోని నారాయణ్పూర్ జిల్లాలోని సీఆర్పీఎఫ్ బేస్క్యాంపుపై మావోయిస్టులు బుధవారం అర్ధరాత్రి దాటాక దాడి చేశారు. అబూజ్మాఢ్ ప్రాంతంలోని ఇరక్భట్టి గ్రామంలో ఇటీవల కొత్తగా బేస్ క్యాంపును ఏర్పాటు చేశారు. ఇక్కడ కుతుల్-ఇరక్–భట్టి మధ్య రోడ్డు నిర్మాణం జరుగుతోంది. ఈ రోడ్డును మావోయిస్టు పార్టీ వ్యతిరేకిస్తోంది. నిర్మాణ పనులకు రక్షణగా సీఆర్పీఎఫ్జవాన్లు నిత్యం పహారా కాస్తున్నారు.
బుధవారం అర్ధరాత్రి జవాన్లు నిద్రిస్తున్న టైంలో మావోయిస్టులు ఒక్కసారిగా బీజీఎల్(బారెల్ గ్రానైడ్ లాంఛర్లు)లతో క్యాంపుపై విరుచుకుపడ్డారు. నాలుగు బీజీఎల్లను ప్రయోగించారు. ఒకటి క్యాంపులో పడినా జవాన్లకు ఏమీ కాలేదు. అప్రమత్తమైన జవాన్లు ఎదురుదాడికి దిగగా మావోయిస్టులు అడవుల్లోకి పారిపోయారు. గురువారం అదనపు బలగాలతో క్యాంపు పరిసర అటవీ ప్రాంతంలో కూంబింగ్నిర్వహించారు.
దండకారణ్యంలో రోప్వే
ఛత్తీస్గఢ్ రాష్ట్రంలోని బస్తర్ దండకారణ్యంలో సీఆర్పీఎఫ్, ఐటీబీపీ జవాన్లు కలిసి రోప్ వే నిర్మించారు. చర్ల సరిహద్దులోని మావోయిస్టు ప్రభావిత బీజాపూర్ జిల్లా పామేడు పీఎస్ పరిధిలోని చింతవాగుపై 200 మీటర్ల పొడవైన రోప్వేను 22 మంది ఇంజినీర్లతో కలిసి నిర్మించారు. దీనికి 33 రోజుల సమయం పట్టింది. అత్యంత మావోయిస్టు ప్రభావిత ప్రాంతమైన ధర్మారం బేస్క్యాంపును ఆనుకునే చింతవాగు ప్రవహిస్తోంది. వర్షాకాలంలో ఈ క్యాంపులోని జవాన్లతో పాటు ధర్మారం, పెద్ద ధర్మారం, సాపేడు, జీడుపల్లి, రావత్ పారా, గాదీగూడ, భాటికీగూడ, కంచాల, కువ్వార్గుట్ట ఆదివాసీలు వాగు దాటాలంటే ఇబ్బందులు పడుతున్నారు.
దవాఖానకు వెళ్లాలన్నా కష్టమే. ఈ నేపథ్యంలో జవాన్లు, ఇంజనీర్లు కలిసి మే 2న వాగుపై రోప్వే నిర్మాణానికి శ్రీకారం చుట్టారు. దశలవారీగా రోప్వేను పరీక్షించార. జవాన్లు అందులో కూర్చుని అటూ, ఇటూ తిరిగారు. విజయవంతం అయ్యిందని నిర్ధారించుకున్నాక బుధవారం ప్రారంభించారు.
