టోక్యో: జపాన్లోని ఇషికావా ఉత్తర మధ్య ప్రాంతంలో సోమవారం భూకంపం సంభవించింది. నోటో ద్వీపకల్పం ఉత్తర భాగంలో 5.9 తీవ్రతతో భూప్రకంపనాలు ఏర్పడ్డ రెండు గంటల్లోనే మరికొన్ని చోట్ల 4.8 తీవ్రతతో మరికొన్ని భూకంపాలు సంభవించాయి. ఈ ఘటనలో ఎలాంటి ఆస్తి, ప్రాణ నష్టం జరుగలేదు.
సునామీ వచ్చే ప్రమాదం లేదని జపాన్ వాతావరణ శాఖ వెల్లడించింది. భద్రతా తనిఖీల కోసం షింకన్‌‌‌‌సెన్ సూపర్-ఎక్స్‌‌‌‌ప్రెస్ రైళ్లు, ఇతర రైలు సేవలను తాత్కాలికంగా నిలిపివేశారు. అనంతరం కొద్దిసేపటికి తిరిగి ప్రారంభించారు. అలాగే, భూకంపం సంభవించిన ప్రాంతానికి సమీపంలోని 2 అణు విద్యుత్ ప్లాంట్లలో ఎలాంటి అసాధారణ పరిస్థితి కనిపించలేదని న్యూక్లియర్ రెగ్యులేషన్ అథారిటీ తెలిపింది.
నోటో ద్వీపకల్పంలోని షికా ప్లాంట్‌‌‌‌కు మాత్రం స్వల్ప నష్టం వాటిల్లిందని, ఇది రెండు రియాక్టర్‌‌‌‌ల కూలింగ్ ఫంక్షన్పై అది ప్రభావితం చూపలేదని అధికారులు పేర్కొన్నారు. విద్యుత్ సరఫరాలోనూ ఎలాంటి అంతరాయం కలుగలేదని హొకురికు
ఎలక్ట్రిక్ పవర్ కార్పొరేషన్ వెల్లడించింది.
