మన శరీరంలో సహజంగా జరగాల్సిన ప్రక్రియలన్నీ సజావుగా జరగడం వల్ల ఆరోగ్య భాగ్యం సిద్ధిస్తుంది. పోషకాహారం తీసుకోవడంతో ఆరోగ్యంతో పాటు శరీరానికి అవసరమైన శక్తి లభిస్తుంది. అలా జరగకపోతే అనారోగ్యం బారిన పడి ఆసుపత్రి పాలు కావలసి వస్తుంది. మనం తీసుకోవలసిన ఆహారం... వయస్సు, లింగ, శారీరక క్రియాశీలత, శారీరక శ్రమ/విధులు లాంటి అంశాలపై ఆధారపడి ఉంటాయి. భారతదేశంలో 74 శాతం ప్రజలకు పోషకాహారం దొరకడం లేదని, ఇటీవల స్థూలకాయ సమస్యలు పెరిగాయని నివేదికలు తెలుపుతున్నాయి.
అసంబద్ధ ఆహారపు అలవాట్లతో 05–-09 ఏండ్ల పిల్లల్లో 5 శాతం, కౌమార యువతలో 6 శాతం వరకు స్థూలకాయ రుగ్మతలతో బాధ పడుతున్నారని, 2 -–10 శాతం వరకు పిల్లలు/ కౌమార వయస్కులు.. డయాబెటిస్‌/ప్రీ-డయాబెటిస్‌ బారిన పడుతున్నారని తెలుస్తోంది.
ఐసీఎంఆర్‌ - ఎన్‌‌‌‌ఐఎన్‌ సంయుక్త నివేదిక
మనం తీసుకునే ఆహారంలో తృణధాన్యాలు, మిలెట్స్‌, పప్పులు, కూరగాయలు, ఆకుకూరలు, పాలు/పాల ఉత్పత్తులు, గుడ్లు, మాంసం, చేపలు, చికెన్‌, నూనె గింజలు, డ్రై ఫ్రూట్స్ లాంటివి నిర్ధారిత మోతాదులో ఉండేవిధంగా జాగ్రత్త పడాలని ఇండియన్‌ కౌన్సిల్ ఆఫ్‌ మెడికల్‌ రీసెర్చ్‌ (ఐసీఎంఆర్‌), నేషనల్‌ ఇన్ స్టిట్యూట్ ఆఫ్‌ న్యూట్రిషన్‌ (ఎన్‌‌‌‌ఐఎన్‌) తాజాగా విడుదల చేసిన 148 పేజీల శాస్త్రీయ నివేదిక స్పష్టం చేస్తోంది. ఉప్పు, చక్కెర, జంక్‌ ఫుడ్స్ పూర్తిగా తగ్గించడంతో పాటు నూనెలు, కొవ్వు పదార్థాలను మితంగా తీసుకుంటూ ఉండాలని నివేదిక తెలుపుతున్నది.
ఇటీవల విడుదల చేసిన నివేదిక ప్రకారం 17 పోషకాహార మార్గదర్శకాలను సిఫార్సు చేస్తూ భారత పౌరులు ఎదుర్కొంటున్న 56.4 శాతం వ్యాధులకు కారణం అనారోగ్యకరమైన ఆహారపు అలవాట్లే అంటూ హెచ్చరిక చేస్తున్నారు. జీవనశైలి వ్యాధులుగా గుర్తించిన బీపీ, షుగర్‌, స్థూలకాయం, హృద్రోగాలు లాంటి అసంక్రమిక వ్యాధులకు కారణం అసంబద్ధ ఆహారమే అంటూ నిర్ధారణ చేస్తున్నారు. జీవనశైలి రుగ్మతలకు విరుగుడుగా సమతుల పోషకాహారంతో పాటు తగిన శారీరక వ్యాయామం లేదా శ్రమ అవసరం అవుతాయని సూచిస్తున్నారు. పోషకాహారం, శారీరక శ్రమ విధానాలను వాడితే టైప్‌-2 మధుమేహం 80 శాతం వరకు నియంత్రించవచ్చని నివేదిక స్పష్టం చేస్తున్నది.
ఐసీఎంఆర్‌ - ఎన్‌‌‌‌ఐఎన్‌ సిఫార్సు చేసిన మార్గదర్శకాలు
సమతుల ఆహారంగా అన్ని రకాల పదార్థాలను తగు మోతాదులో తీసుకోవాలి. గర్భిణులు, శిశువులకు అదనంగా ఆహారం అందించాలి. శిశువులకు తొలి ఆరు నెలలు తల్లి పాలు అందించాలని, కనీసం 2 ఏండ్ల పాటు తల్లిపాలు ఇవ్వాలి. ఆరు మాసాలు దాటిన పిల్లలకు తల్లి పాలతో పాటు ఇంట్లో తయారుచేసిన సెమీ- సాలిడ్‌ ఫుడ్స్ ఇవ్వాలని సూచిస్తున్నారు.
ఎదిగే పిల్లలు, కౌమార, యువత శారీరక ఎదుగుదలకు తగు అదనపు ఆహారం అందించాలి. అధిక కూరగాయలు, చిక్కుళ్లు తీసుకోవాలి. దిన చర్యలకు అనుగుణంగా తగు మోతాదుల్లో నూనెలు, కొవ్వు పదార్థాలు తీసుకోవాలి. ప్రయోజనకర మాంసకృత్తులు, అత్యవసర ఆమ్లాలను తీసుకోవాలి. ప్రతిరోజు శారీరక వ్యాయామం లేదా శ్రమ ఉండే విధంగా ప్రణాళికలు వేసుకోవాలి.
ఉప్పును పూర్తిగా తగ్గించాలి. సురక్షిత, శుభ్రమైన ఆహార పదార్థాలను తీసుకోవాలి. వంటకాలు వండే పద్ధతులను తగు రీతిలో మార్చుకోవాలి. తాగునీటిని ఎక్కువగా తీసుకోవాలి. జంక్‌, అల్ట్రా ప్రాసెస్డ్‌, ప్యాకేజ్‌ ఫుడ్స్ తగ్గించాలి. అధిక కొవ్వులు, చక్కెరలు, లవణం ఉన్న ఆహార పదార్థాలకు దూరంగా ఉండాలి లేదా పూర్తిగా తగ్గించాలి. పెద్దలకు అవసరమగు తగు పోషకాహారం అందించాలి. ఆహార పదార్థాల ప్యాకెట్లపై సూచించిన విషయాలను చదివి తెలుసుకోవాలి.
‘మై ప్లేట్‌ ఆఫ్‌ ది డే’
సమతుల భోజనం లేదా ‘మై ప్లేట్‌ ఆఫ్‌ ది డే’లో ఉండాల్సినవి ఈ విధంగా ఉన్నాయి. 2000 కిలో కాలరీల భోజనంలో 400 గ్రాముల కూరగాయలు, 100 గ్రాముల పండ్లు, 250 గ్రాముల తృణధాన్యాలు, 300 మిలీ పాలు/పెరుగు, 85 గ్రాముల పప్పులు/చిక్కుళ్లు/మాంసం/చేపలు, 62 గ్రాముల నట్స్‌/సీడ్స్‌/కొవ్వులు/నూనెలు తగు మోతాదులో ఉండేవిధంగా చూసుకోవాలి. ‘మై ప్లేట్‌ ఆఫ్‌ ది డే’ నిమిత్తం 8 రకాల ఆహార పదార్థాలను సూచిస్తున్నారు.
తృణధాన్యాలు, మిలెట్స్‌ విభాగంలో (బియ్యం, గోధుమలు, చిరుధాన్యాలు లాంటివి), పప్పులు (కంది, పెసర, శనగ, మినుములు, రాజ్‌‌‌‌మా లాంటివి), నట్స్‌ లేదా డ్రైఫ్రూట్స్‌ (పల్లీలు, బాదాం, పిస్తా, వాల్‌‌‌‌నట్స్‌ లాంటివి), ఆయా కాలాల్లో లభించే అన్ని రకాల కూరగాయలు/ఆకుకూరలు, పాలు/పాల ఉత్పత్తులు (పెరుగు, మజ్జిగ, పాలు), దుంపలు/రూట్స్‌ (క్యారెట్‌, బీట్‌‌‌‌రూట్‌, రాడిస్‌, కందలు, ఆలుగడ్డలు లాంటివి), మాంసాహారం (చేపలు, చికెన్‌, రెడ్‌ మీట్‌), సుగంధ ద్రవ్యాలు/మూలికలు (పసుపు, అల్లం, వెల్లుల్లి, పెప్పర్‌, ధనియా, ఆవాలు, జీలకర్ర లాంటివి) వస్తాయని తెలుసుకోవాలి. నిత్య భోజనంలో 45 శాతం వరకు తృణధాన్యాలు/మిలెట్స్‌, 15 శాతం వరకు పప్పులు/గుడ్లు/మాంసం, 30 శాతం వరకు కొవ్వులు, 10 శాతం నూనె గింజలు ఉంటే సరిపోతుంది.
డూస్‌ అండ్‌ డోన్ట్స్‌
చేయాల్సినవి, చేయగూడనివి పరిగణనలోకి తీసుకుంటే... ఉప్పు, చక్కెర, కొవ్వులను పూర్తిగా నియంత్రించాలి. ఆల్కహాల్‌, ధూమపానం, గుట్కా లాంటి దురలవాట్లకు దూరంగా ఉండాలి. తక్కువ పోషక విలువలు ఉంటూనే ప్రమాదకరమైన ఉప్పు, చక్కెర, కొవ్వులు అధికంగా ఉన్న ఆహార పదార్థాలను జంక్‌ ఫుడ్స్ అంటున్నాం. జంక్‌ ఫుడ్స్, ప్యాకేజ్డ్‌ ఫుడ్స్, అల్ట్రా - ప్రాసెస్డ్‌ ఫుడ్స్‌‌‌‌ను పూర్తిగా నివారించాలి. నిత్యం శారీరక వ్యాయామం లేదా పని చేయాలి. సమతుల పోషకాహారాన్ని తీసుకోవాలి. ఫుడ్‌ ప్యాకెట్స్‌‌‌‌ను ఖరీదు చేసేముందు ఆ ప్యాకెట్‌‌‌‌పై రాసిన సూచనలను/హెచ్చరికలను పూర్తిగా అర్థం చేసుకోవాలి.
ఆరోగ్యకర జీవనశైలిని పాటించడం ద్వారా అనారోగ్యాలు, అకాల మరణాలు కట్టడి చేయవచ్చు. మనదేశంలో ఆహార పదార్థాల వినియోగం పెరగడం, శారీరక శ్రమ తగ్గడం, ప్రతికూల ఆహార పదార్థాలకు ఎక్కువగా అలవాటుపడడంతో పోషకాల లోపం ఏర్పడుతోంది. స్థూలకాయ జనాభా పెరగడం, అనారోగ్యం పాలు కావడం సర్వదా కనిపిస్తున్నది. భారతీయ కుటుంబాలు, పౌర సమాజం ఆరోగ్యం పట్ల అవగాహన పెంచుకుని, సమతుల ఆహారం దిశగా అడుగులు వేస్తూ ఆరోగ్య భారతదేశ నిర్మాణంలో భాగస్వాములవ్వాలి.
- డా. బుర్ర మధుసూదన్ రెడ్డి
ఎనలిస్ట్
