- బీఆర్ఎస్ అభ్యర్థిపై స్పష్టత ఇవ్వని పెద్దలు
కామారెడ్డి, వెలుగు: ఇటీవల జిల్లాలో పర్యటించిన మంత్రి కేటీఆర్ఎల్లారెడ్డి అభ్యర్థి జాజాల సురేందర్పోటీపై క్లారిటీ ఇవ్వగా, కామారెడ్డిలో ఎవరు బరిలో నిలుస్తారనే విషయంపై స్పష్టతనివ్వలేదు. కామారెడ్డి నుంచి సీఎం కేసీఆర్ పోటీ చేస్తారనే ప్రచారంతో పాటు, పోటీ చేయాలని తానే స్వయంగా కోరినట్లు కొన్ని రోజుల క్రితం గంప గోవర్ధన్ అసెంబ్లీ సమావేశాల సందర్భంగా మాట్లాడారు. ఈ నేపథ్యంలో మూడు రోజుల కింద కేటీఆర్ జిల్లా పర్యటన పై సర్వత్రా ఆసక్తి నెలకొంది. కామారెడ్డి నుంచి ఎవరు పోటీ చేస్తారనే అంశంపై క్లారిటీ ఇస్తారని అంతా భావించారు. కానీ కేటీఆర్ మాత్రం ఎక్కడా పొలిటకల్ అంశాలకు తావివ్వకుండా, కేవలం ఫండ్స్ కేటాయింపు గురించి మాత్రమే మాట్లాడారు.
దీంతో సిట్టింగ్ఎమ్మెల్యే గంప గోవర్ధన్ వర్గీయుల్లో టెన్షన్ మొదలైంది. రాష్ట్రంలో అసెంబ్లీ ఎన్నికలు సమీపిస్తున్న తరుణంలో బీఆర్ఎస్ అధినేత కేసీఆర్, వర్కింగ్ ప్రెసిడెంట్ కేటీఆర్ఎక్కడ మీటింగ్లకు వెళ్లినా అక్కడి సిట్టింగ్ఎమ్మెల్యేలకు పోటీపై స్పష్టతనిస్తున్నారు. గత ఎన్నికల్లో వచ్చిన మెజార్టీ కంటే రెట్టింపుతో గెలిపించాలని కోరుతున్నారు. ఎల్లారెడ్డి బహిరంగసభలోనూ సురేందర్ను 70 వేల ఓట్ల మెజార్టీతో గెలిపించాలని కోరిన కేటీఆర్ కామారెడ్డిలో పోటీ అంశాన్ని ప్రస్తావించకపోవడం చర్చాంశనీయమైంది..
మిగతా చోట్ల క్లారిటీ..
జిల్లాలో నాలుగు అసెంబ్లీ నియోజకవర్గాలకు గాను 3 చోట్ల బీఆర్ఎస్అభ్యర్థుల విషయంలో ఇప్పటికే స్పష్టతనిచ్చారు. ఈ ఏడాది మార్చి 1న బాన్సువాడ నియోజకవర్గానికి వచ్చిన సీఎం కేసీఆర్, తిమ్మాపూర్ వెంకటేశ్వరస్వామి టెంపుల్వద్ద మీటింగ్లో తాను సభలో ఉన్నన్ని రోజుల్లో శీనన్న కూడా ఉంటారంటూ క్లారిటీ ఇచ్చారు. మార్చి 15న జుక్కల్ నియోజకవర్గంలో పర్యటించిన కేటీఆర్ వచ్చే ఎన్నికల్లో ఎమ్మెల్యే హన్మంత్షిండేను భారీ మెజార్టీతో గెలిపించాలని కోరారు. జిల్లాలోని 3 నియోజకవర్గాలపై అభ్యర్థుల విషయంలో పార్టీ అధినేతలు స్పష్టతనిచ్చి, కామారెడ్డిని మాత్రం డైలామాలో ఉంచారు.
పోటీకి పలువురి ఇంట్రెస్ట్..
కామారెడ్డి నుంచి బీఆర్ఎస్ తరఫున పోటికి సిట్టింగ్ఎమ్మెల్యే గంప గోవర్ధన్తో పాటు మరికొందరు ఆసక్తి చూపుతున్నారు. పార్టీ జిల్లా ప్రెసిడెంట్, స్టేట్ ఉర్దూ అకాడమీ చైర్మన్ ముజీబోద్దీన్, సీనియర్లీడర్, మున్సిపల్ చైర్పర్సన్ జాహ్నవి తండ్రి నిట్టు వేణుగోపాల్రావు, మాచారెడ్డి ఎంపీపీ లోయపల్లి నర్సింగ్రావులు పోటీకి ఆసక్తిగా ఉన్నారు. కేటీఆర్ ద్వారా టికెట్కోసం ప్రయత్నిస్తున్నారు. ఇక్కడి నుంచి సీఎం కేసీఆర్ పోటీ చేసే ఆలోచన చేస్తున్నారనేది ప్రచారంలో ఉంది. ఇక్కడ పార్టీ పరిస్థితిపై కేసీఆర్ ప్రత్యేక సర్వే చేయించారు. కేసీఆర్ను తానే ఇక్కడి నుంచి పోటీ చేయాలని కోరినట్లు సిట్టింగ్ ఎమ్మెల్యే గంప గోవర్ధన్ప్రకటించారు. దీనిపై కాంగ్రెస్ నేత షబ్బీర్ అలీ, గంప గోవర్ధన్ మధ్య మాటల యుద్ధం సాగింది. మొత్తం మీద కామారెడ్డి బీఆర్ఎస్ అభ్యర్థిపై సందిగ్ధత నెలకొంది.
