- 2 టీచర్, ఒక గ్రాడ్యుయేట్ ఎమ్మెల్సీ స్థానాలకు ఎలక్షన్స్
- 3న నోటిఫికేషన్..10వరకు నామినేషన్ల స్వీకరణ
- 13 వరకు విత్ డ్రాకు చాన్స్.. మార్చి 3న కౌంటింగ్
న్యూఢిల్లీ, వెలుగు: రాష్ట్రంలో 3 ఎమ్మెల్సీ స్థానాలకు ఎన్నికల నగారా మోగింది. ఒక గ్రాడ్యుయేట్, 2 టీచర్ఎమ్మెల్సీ ఎలక్షన్స్కు షెడ్యూల్ రిలీజ్అయింది. ఖాళీగా ఉన్న ఈ 3 స్థానాలకు వచ్చే నెల 27న ఎలక్షన్ నిర్వహించనున్నట్టు కేంద్ర ఎన్నికల సంఘం (సీఈసీ) ప్రకటించింది. ఈ మేరకు బుధవారం ఎలక్షన్ షెడ్యూల్ రిలీజ్ చేసింది. వరంగల్– - ఖమ్మం –- నల్లగొండ ఉపాధ్యాయ, మెదక్– - నిజామాబాద్– -ఆదిలాబాద్ –కరీంనగర్ ఉపాధ్యాయ, మెదక్– - నిజామాబాద్– - ఆదిలాబాద్ –- కరీంనగర్ పట్టభద్రుల స్థానానికి ఎన్నికలు నిర్వహించనున్నారు.
ఫిబ్రవరి 3న నోటిఫికేషన్ విడుదల చేయనున్నట్టు ఈసీ ప్రకటించింది. ఫిబ్రవరి 10 నామినేషన్లకు చివరి తేదీగా ప్రకటించింది. ఫిబ్రవరి 13 వరకు నామినేషన్ల ఉపసంహరణకు అవకాశం కల్పించింది. ఫిబ్రవరి 27న పోలింగ్ నిర్వహించి, మార్చి 3న ఓట్ల లెక్కింపు చేపట్టనున్నది. అయితే, తెలంగాణలో గ్రాడ్యుయేట్ ఎమ్మెల్సీ జీవన్ రెడ్డి (మెదక్ - –నిజామాబాద్– - ఆదిలాబాద్ –- కరీంనగర్), ఉపాధ్యాయ ఎమ్మెల్సీలు కూర ర‌‌ఘోత్తం రెడ్డి (మెదక్– - –నిజామాబాద్ -– ఆదిలాబాద్ - –కరీంనగర్), అలుగుబెల్లి న‌‌ర్సిరెడ్డి( వరంగల్– -ఖమ్మం– -నల్లగొండ) పదవీ కాలం మార్చి 29తో ముగియనుంది.
ఈ నేపథ్యంలో మార్చి 8వ తేదీలోపే ఎన్నికల ప్రక్రియను ముగించనున్నట్టు ఈసీ వెల్లడించింది. అలాగే, ఏపీలోని ఉమ్మడి ఉభయ గోదావరి జిల్లాల పట్టభద్రుల స్థానానికి, కృష్ణా - -గుంటూరు గ్రాడ్యుయేట్ స్థానానికి, శ్రీకాకుళం-- విజయనగరం-- విశాఖపట్నం టీచర్ స్థానానికి ఎన్నికలు జరగనున్నాయి.
