హైదరాబాద్ గచ్చిబౌలి స్టేడియంలోని ఒలంపిక్ భవన్ లో నేడు (నవంబర్ 21)న తెలంగాణ ఒలింపిక్ అసోసియేషన్ ఎన్నికలు నిర్వహించనున్నారు. మధ్యాహ్నం 12 గంట‌ల నుంచి సాయంత్రం 4 గంట‌ల వ‌ర‌కు పోలింగ్‌ ఉంటుంది. ఇదే రోజు సాయంత్రం 4.30గంటలకు కౌంటింగ్ ప్రారంభించి.. ఫలితాలు వెల్లడిస్తారు. మాజీ ఎంపీ జితేందర్ రెడ్డి, బ్యాడ్మింట‌న్ సంఘం ఉపాధ్యక్షుడు చాముండేశ్వర్‌నాథ్‌ లు అధ్యక్ష స్థానానికి పోటీ ప‌డుతున్నారు. మ‌ల్లారెడ్డి, బాబురావు లు కార్యదర్శి ప‌ద‌వికి బ‌రిలో నిలిచారు.
మూడ్రోజుల క్రితం అధ్యక్షుడిగా పోటీ చేస్తున్న చాముండేశ్వరీ నాథ్‌ తెలంగాణ స్పోర్ట్స్‌ శాఖ ముఖ్య కార్యదర్శి జయేశ్‌ రంజన్‌, ఎన్నికల రిటర్నింగ్‌ అధికారి జస్టిస్‌ సి.ప్రవీణ్‌ కుమార్‌ను కలిసి ఎన్నికలను ఆపాలని కోరారు. అధ్యక్షుడిగా పోటీ చేస్తున్న ఏపీ.జితేందర్ రెడ్డి తెలంగాణ రాష్ట్ర ప్రభుత్వ క్రీడల సలహాదారుగా క్యాబినెట్‌ ర్యాంకులో ఉన్నారు. ఆయన పోటీ చేయడానికి అర్హుడు కాదని కొందరు అంటున్నారు. ఈ మేరకు తెలంగాణ ఒలింపిక్స్‌ అసోసియేషన్ ఎన్నికలు రసవత్తరంగా మారాయి.
