- నార్లాపూర్ పంప్హౌస్కు కరెంట్ సరఫరా నిలిపేసిన ట్రాన్స్కో
- రూ.700 కోట్ల బిల్లులు ఆర్థిక శాఖ వద్ద పెండింగ్
- 2022లో రూ.500 కోట్లకు బిల్లులు రైజ్ చేసిన ట్రాన్స్కో
- నాడు బీఆర్ఎస్ హయాంలో ఆర్థిక శాఖ వద్ద పెండింగ్
- కేసీఆర్ ప్రాజెక్టును ప్రారంభించడానికి ముందే కరెంట్ కట్ చేసిన ట్రాన్స్కో
హైదరాబాద్, వెలుగు: పాలమూరు– రంగారెడ్డి ఎత్తిపోతల పథకంలో భాగమైన నార్లాపూర్ పంప్హౌస్కు విద్యుత్ శాఖ కరెంట్ కట్ చేసింది. గత బీఆర్ఎస్ ప్రభుత్వం ఏడాదిన్నరపాటు బిల్లులు పెండింగ్లో పెట్టడం.. కాంగ్రెస్ అధికారంలోకి వచ్చాక కూడా బిల్లులు చెల్లించకపోవడంతో ఈ నిర్ణయం తీసుకున్నది. వాస్తవానికి నాటి బీఆర్ఎస్ హయాంలోనే బిల్లులు పెండింగ్ పెట్టగా.. అప్పటి సీఎం కేసీఆర్ పాలమూరు ప్రాజెక్టును ప్రారంభించడానికి ముందే విద్యుత్శాఖ కరెంట్సరఫరాను నిలిపేసింది. పాలమూరు ప్రాజెక్టు కోసం ట్రాన్స్కో ఓ సబ్స్టేషన్తో పాటు భారీ లైన్లను నిర్మించింది. దానికి రూ.500 కోట్లు ఖర్చు చేసింది. దానికి సంబంధించి 2022 జూన్ 6నే బిల్లులకు సంబంధించిన ఫైలు ఆర్థిక శాఖకు చేరినా.. డబ్బులు మాత్రం రిలీజ్ చేయలేదు.
దీంతో 2023 సెప్టెంబర్ 16న కేసీఆర్ ప్రారంభించాలనుకున్న ప్రాజెక్టుకు ట్రాన్స్కో అధికారులు కరెంట్ కట్ చేశారు. అయితే, అధికారులపై ఒత్తిడి తీసుకొచ్చి, తాత్కాలికంగా కరెంట్ సరఫరాను పునరుద్ధరించేలా చేశారు. అది కూడా ఒక్క మోటార్ నడవడానికే కరెంట్ఇచ్చారు. కేసీఆర్ ఆ పథకాన్ని ప్రారంభించిన రెండు రోజులకే మళ్లీ కరెంట్ను కట్ చేశారు. అయినా కూడా బిల్లులు చెల్లించలేదు. మరోవైపు కాంగ్రెస్ ప్రభుత్వం అధికారంలోకి వచ్చాక మరో రూ.200 కోట్ల బిల్లులు కాగా.. దానికి కూడా ట్రాన్స్కో అధికారులు ఆర్థిక శాఖ వద్ద బిల్లుల క్లియరెన్స్కు అప్లికేషన్ పెట్టుకున్నారు. మొత్తంగా ఇప్పటివరకు రూ.700 కోట్ల వరకు బకాయిలు పడడంతో ఆ ప్రాజెక్టుకు కరెంట్ను నిలుపుదల చేసినట్టు అధికారులు చెబుతున్నారు. కాగా, నార్లాపూర్ పంప్హౌస్లో 145 మెగావాట్ల సామర్థ్యం ఉన్న 8 మోటార్లను పెట్టాలని నిర్ణయించినా.. 4 మోటార్లనే ఏర్పాటు చేశారు. ట్రాన్స్కో లైన్ ఇచ్చి డిస్కంలు విద్యుత్ సరఫరాను పునరుద్ధరిస్తేనే నార్లాపూర్ రిజర్వాయర్ను నింపుకొనే పరిస్థితులు ఉంటాయని చెబుతున్నారు.
కల్వకుర్తిలో 2 మోటార్లు పనిచేయట్లే..
పాలమూరు ప్రాజెక్టుకు కరెంట్ నిలిపివేత ఎఫెక్ట్ ఇప్పుడు పరోక్షంగా కల్వకుర్తి లిఫ్ట్పై పడినట్టయింది. కల్వకుర్తి లిఫ్ట్ స్కీమ్లో 30 మెగావాట్ల కెపాసిటీ ఉన్న 5 మోటార్లుండగా.. అందులో 2 మోటార్లు నాలుగేండ్లుగా పనిచేయడం లేదు. బ్రెస్ట్ వాల్ కూలిపోవడంతో మోటార్లకు నీటిని తీసుకెళ్లే ట్యూబ్లు దెబ్బతిన్నాయి. వాటికి రిపేర్లు చేయాలంటే శ్రీశైలంలో నీటి నిల్వలు తగ్గడంపైనే ఆధారపడి ఉంది. ప్రాజెక్టులో నీటి నిల్వ తగ్గితే.. హెడ్ రెగ్యులేటర్ను కట్టి.. డ్రాఫ్ట్ ట్యూబ్లను సరిచేయాల్సి ఉంటుందని అధికారులు చెబుతున్నారు. ప్రస్తుతం శ్రీశైలం ప్రాజెక్టులో నీటి నిల్వలు తగ్గిపోతుండడంతో రిపేర్లకు ఇదే కరెక్ట్ టైం అని అధికారులు భావిస్తున్నారు. మరోవైపు ఈ ప్రాజెక్టు నుంచే ఏడు జిల్లాలకు తాగునీటిని అందిస్తున్నారు.
ఈ ప్రాజెక్టుకు రిపేర్లు చేస్తే.. నార్లాపూర్ రిజర్వాయర్ నుంచి కల్వకుర్తి ప్రాజెక్టులోని ఎల్లూరుకు తరలించి.. తాగునీటి సరఫరాకు ఇబ్బందులు లేకుండా చూడొచ్చని అధికారులు అనుకుంటున్నారు. పాలమూరులోని నార్లాపూర్, కల్వకుర్తి లిఫ్ట్లోని ఎల్లూరు రిజర్వాయర్లు పక్కపక్కనే ఉండడంతో ఏ ఇబ్బంది లేకుండా నీటిని తరలించొచ్చన్న ఉద్దేశంతో ఉన్నారు. కానీ, ప్రస్తుతం నార్లాపూర్ పంప్హౌస్కు కరెంట్ కట్ చేయడంతో ఇది కూడా సందిగ్ధంలో పడినట్టయింది. కాగా, నార్లాపూర్ రిజర్వాయర్ పనులు దాదాపుగా పూర్తయినా.. అక్కడి నుంచి ఏదుల రిజర్వాయర్కు నీటిని తరలించే కాలువ పనులు మాత్రం చాలా కాలంగా పెండింగ్లో పడిపోయాయి. 8 కిలోమీటర్ల మేర పనులు ఏడాదిన్నరగా పెండింగ్ ఉన్నాయి. అయితే, అంచనాలను సవరిస్తే తప్ప పనులు చేసేది లేదని కాంట్రాక్టర్ ఆ పనులు ఆపేశారు. ఈ నేపథ్యంలోనే వీలైనంత త్వరగా ఈ రెండు సమస్యలను పరిష్కరించాల్సిన అవసరం ఉందని అధికారులు అంటున్నారు.
